’10 buba Hornbill Naga Wrestling championship’ Dec 7 nü melangteptsü

Kohima, December 4 (TYO) : December 7, 2016 nü Amphitheatre, Naga Heritage Village, Kisama nung melangteptsü aliba, 10buba International Hornbill Naga Wrestling Championship 2016 nung Nagaland Wrestling Association (NWA) asem, Angami Sports’ Association (ASA), Chakhesang Wrestling Association (CWA) aser Zeliang Wrestling Association (ZWA) teloktem nungi shilem agitsü. Parnok den ano Manipur nungi Poumai aser bendanglen nungi arurtema iba tetoktepba nung adentsü.
Küm shia anogo terer amungba, Hornbill festival nung Naga nunger puti aser sobaliba ajunga sayuteper. Item rongnung Naga nunger yimya nung melangtepba ya alemli mapang nungi asaya aruba asaya rongnung ka lir koba nüburtemi kanga sapur.
Hornbill Naga Wrestling Championship ya 2007 küm nungi Department of Tourism, Nagaland-i senotzü nung nungita Nagaland Wrestling Association (NWA)-i ayonga arur.
Iba asaya nung NWA dang masü saka Poumai, Aor aser bendanglen nungi arurtemi dena shilem agir.
2009 küm mezüng buba Naga-Korean Wrestling championship-a agia liasü. Bendangleni nungi arurtemi jangrabangra shilem agiba ngua NWA-i 2015 küm iba championship tenüng “International Hornbill Naga Wrestling Championship” ta melen saka melangtepba aser tetendangba yimyabo akhi ama tang lir.
2016 championship nung NWA, kidanger kintem aser bendanglen nungi arur melangteper tajungtibatemi shilem agitsü. Taküm küm tetenzüklen NWA tenzüker küm 25 ajungba mung amungba sülen tan 10buba melangtepba sentong ya balaka asütsü.
Osang ajanga ashiba agi, tang tashi nung NWA nungi melangteper 36-i iba tetetoktepba nung shilem agitsü atema tenüng agüja lir.
State aser international nungi melangtepba nung shilem agitsü jangrartemi December 7, 2017 tashi nung tenüng agütsütsü lapokja lir, ta NWA-i metetdaktsü.
Iba melangtepba nung takok angur nem sen 80,000/- aser tanabuba jenjang nung takok angur nem sen 50,000/- senpet den kuli kaket agütsütsü. Semi-final nung tamakok angurtem nem sen meyirjang metsütsü (20,000 each), quarter-final nung tamakok angurtem nem sen meyirjang pungugu (5,000 each) aser pre-quarter final-i aitertem nema sen meyirjang anana (2,000 each) senpet den kuli kaket agütsütsü.
Iba sentong ya Advocate Timikha Koza-i lapoktsütsü aser Tenyimia Public Organization (TPO) Tir, Tongti tesemdanger asütsü. Melangtepba mapang Hangcheu Zeliang (ZWA), Kezhalelie Kerütsü (ASA) aser Surhoneyi Soho (CWA) nunger refree alitsü. Hukhoneyi Soho, Chisazo Dawhuo, Kikhwesul Thokhwe aser Visakhoto Krose nunger Jury Board nung züngsemtem asütsü.
Sentong tenzükba mapang NWA Tongti Tezülur Vekhozo menden asütsü, St. Joseph College, Jakhama Vice Principal, Rev. Fr. Anthony R. Dukru-i temoatsü meshia sarasademtsü, Tir tayongzükba o NWA Tir, Neivikuolie Khatsü-i jembitsü. Sentong nung Pholami sobaliba teloki shilem balaka agitsü aser NWA Technical Secretary, Visakhoto Krose-i melangtepertem tenangzükba agidaktsütsü.