10 buba Marsosang Football Trophy meraketa tenzükogo

Asayamong tenzüktsür, Minister Nuklutoshi; mezüng asaya nung shilem agir, Marsosang SC o Metju SA asayartem aser asayamong tayonger, Rocky Club ketdangsertemi agiba arok noksa ka yangi angur. (Chuchu Town, December 10)

Chuchu Town, December 10 (TYO): Nagaland National Highway, Mechanical Engg. & Election Minister, Nuklutoshi Longkümeri 10 buba Marsosang Football asayamong Chuchuyimlang kübok GHS playground nung meraketa tanü Brehostibar nü tenzüktsüogo.
Tan asayamong nung telok 11-i toktepa shilem agiba sülen temaba jenjang anguba telok nem takok marok o kulikaket den külemi, senpet sena lakh 1 agütsütsü renema lir.
Rocky Club-i küm 2 nung ken ayongba asayamong nung tanabuba jenjang anguba telok nema senpet sen 50,000 agütsütsü renemogo.
“Tanü putu nung football asaya ya kanga dang nungtugu aser peipok mesütsüsa tajangzük bener arutsüba asaya ka kümogo,” ta tongti tesemdangeri metetdaktsü.
“Taoba mapangbo India nung football asaya kanga nungtugu süa masaya saka tanübo football asayatsü shilem nung ajaki temulung kanga agütsüba angur. Anungji, asen liso nisungtema national aser international jenjang nung takok ngua shilem agitsü nükla tulu yur asayatsü ajungshir,” ta pai ayongzük.
Küm 10 tashi asayamong takok tulu ngua ayongba atema tayonger nem tenüngsang agütsüba den külemi, iba asayamong ayongba ajanga sempet tajung aketba asayartemi temaba jenjang nung toktepa shilem agitsü asoshi renemshitsü maongka tajung angur ta pai metetdaktsü.
“Asen Naga nunger rong nung sempet tajung aketba asayar tajung aika lir saka parnok aikati asayamong kar nung takok ngua konang nungsang anguba sülen asükümadoker mesüra achiajem nung mazüoker ka küma par alizüng metongteti taküm raksar,” ta tongti tesemdangeri temulung shiranga ashi.
“Football asayaba ajanga takar küma jangratema linüra, asayartemi tazüokba nung alitsü aser ajemalushir bendanga agüja asayatsüji kanga dang tongtipang,” ta pai ajungshia liasü.
Chuchuyimlang nung 1900 küm asosang, asür Marsosang 1991 küm asüba jakdang contractor aser tongti shishilembar ka aliba den külemi, Mokokchung jila nung mezüng sensopur rong nung densema liasü.