‘1001 Olong Ratet’ kaket sayaogo

“1001 Olong Ratet” kaket sayatsür Kohima Town Baptist Arogo Pastor, Sentisashi Aier (Achichi) den kaket zülur S. Wati Ozüküm (tiyong) aser Woods Publishers kibur Repalemzüng Longkumer kaket sayaba mapang tangokba noksa nung angur. (June 27, 2020 )

Mokokchung, June 28 (TYO): Mopungchuket nunger S. Wati Ozüküm-i Ao oshi nung züluba kaket ka tenüng agi “1001 Olong Ratet” June 27 nü Kohima yimtiba nung Kohima Ao Baptist Arogo, Pastor, Sentisashi Aier-i meshiteta sarasademer sayatsüogo.
‘Olong’ ya tagitsü o dang shima jembiba dang ajar. Kodang onük ka tapet olong agi metanga jembidir, iba jagi onükji tali tarokba aser tabensaba nung rajema angatettsü akoker. Aji oda, olong ajanga onük ka o mulung tuyua jeta angajemdaktsür. Iba yongji tsüraburtemi jembishinü ajak nung olong kanga senpua amshi, ta kaket züluri iba kaket nungji shia lir.
Jembibatemji kaket küma yanglur rizünga yutsüra, lanu putu asoshibo senti rongsen asütsü ta mapang aben ajungshia liasü. Anungji, item jagi tasü itshir tsüraburtem, teti nungertem, külem pursatong aser tenu nungertem dang nungi teyari bushitepa olong bendena tetezü aser teratet bushitsü tenzük, ta kaket nungji shia angutsü.
O ya yintsü, putusa putu alir, anungji, shitakba tsürabur senmangbo ya dang. Ibaji mesamadaktsüi lanurtemi jangraa jembitsüsa, tsüraburtemia teti atishijem amshia pei chirnur dang sayubentsütsübaji tanü putu nung balaka kanga tongtibang kümogo. Iba ama putu ka nung iba atishijem kaket ya asenok asoshi rongsen tuluka asütsü, ta iba kaket nung o semlok zülutsür Tir Yimyim Editor, K. Temjen Jamiri shia angutsü.
Iba kaket asangsang küma adoktettsüsa shirnokisa lenmang balala ajanga yaritepogo, parnok ajak dang pelaba kaket zülurisa metetdaktsü. Iba kaket nung olong ratet 1001 keta lira ser kaket tapak 270 lir. Kaket jenjang senpak 599/- ajenloka lir, saka alima tia asadanger senpak 500/- agi dang ayoktsü. Iba kaket ya Woods Publishers nung menüng.
Kaket item tesemtem nung angutsü; Kohima nung – woodland handicraft opp. State library, Students book centre near P.R. hill, Kohima book centre opp. war cemetery, Bible house near NST station, OM book centre, old NST & Made in Nagaland opp. New secretariat. Dimapur nung – Modern book depot, OM book centre, Christian literature centre, (Alem imsong: 9862580627). Mokokchung nung – Eastern book depot MTBA Complex (Tiawapang: 9862983463) aser Changtongya town nung Classmate dokan nung angutsü. Iba den online: Amazon ajanga mangatsü akok.