10th Imchaba Master Memorial volleyball trophy asayatsü

Mokokchung, August 28: “10th Imchaba Master Memorial” Nagaland Open Volleyball Trophy 2015 taküma September 22 nungi 25 tashi Mokokchung Multi-Sports Complex nung ayongzüka lir. Iba asayamung ya Mokokchung District Volleyball Association (MDVA)-i ayongzüker.
Tang tashi nung Nagaland nung volleyball asayamung rongnung senpet sen teimtibaji iba asayamung ya asütsü. Taküma shir teloki tematiba jenjang ajangzükdir senpet sen 70,000/- agütsütsü. tatong nemji sen 45,000/-, tasembuba nem 30,000/- aser pezübuba nem 20,000/- ta agütsütsü lemtetogo ta tayongeri metetdaktsü.
Iba den ano jurila senpet (Individual Prizes) Best Spiker, Best Setter aser Player of the Tournament ta shima senpet balala agütsütsü ta parnokisa ashi. Iba asayamung nung asaya ketdangsertemji certified referees-tem dang asütsü ta osang ajanga metetdaktsü.
Osang tajung kaji; Final Four-i aiertem dak alaka asayamung nung shilem agir telok shia nem tayongeri participation grant ta ser sen 5,000/- agütsütsü. Ano tanga district nungi arurtem asoshibo taru-tao taa (minimum travelling allowance) anepalutsütsü. Iba dak sentakba nung tejangrartemi Entry Forms-ji Lim Counter (kohima/Dimapur/Mokokchung) nung angutsü aser September 16 tashi nungbo form-ji tongseptsüla ta MDVA-isa metetdaktsü.
Kari danga iba asayamung dak sentakba nung osang tejangja metetnüra Planning Committee Convener (9856663548) mesüra Technical Committee Convener (9436218083) den tongteprateptsü akok.