10th N Angami 1A/C asoshi Khriehu-i ‘declaration’ agutsü

Kohima, Aenjeti (January) 27 (TYO): Aenjeti 26, 2018 nü Rùleizou nung 10th Northern Angami 1A/C nung tokteptsü tebilemba alisang candidate, Khriehu Liezietsu-i election nung tokteptsü atema sangdongogo, ta NPF 10th Northern Angami 1 A/C Media cell sangdong ka nung metetdaktsü.
NPF 10th NA 1A/C Tir, Keduolhoutuo Rutsa leniba nung iba sentong agi aser Farmers’ Wing Tir, Ruokuozhalie Khruomo-i candidate aser party nung inyakertem atema sarasademtsü.
Sentong nung jembidang Khriehu Liezietsu-i 10NA 1 A/C nung aliba nüburtemi 2013 küm election nung pa shimba atema pelaba lemsatep.
Pai state sorkar matsüngdang mapatong aser projects aika benoka lir, aser pa nem ano maongka agütsüra item ajakji agizükdakja senotsü lemzüktsütsü atema inyaktsü, ta paisa metetdaktsü.
“Iba ya Naga nunger, talisa constituency nung alirtem ajangzüktsü atema lir. Assembly nung züngsem akumtsü atema ni ano shimang aser kü tajungtiba agi asenok ajak atema inyaktsü,” ta paisa ashi.
Sentong nungsa NPF Tir, Dr. Shùrhozelie Liezietsu, ”Alhouù Dzùvichù’, ‘Medoselhou Keretsù’ aser Kohima Division NPF Tir, ‘Guoneiu nungeria jembia liasü. Ano 8th Western Angami A/C aser 9th Kohima Town A/C nungi tokteptsü tebilemba alir Keneizhakho Nibu Nakhro aser Dr. Tseilhoutuo natia jembia liasü.
Tesüsa 10th Northern Angami 1 A/C NPF Youth Wing Tir, Aviu Suokhrie-i tepela anküp o jembia sentong tembanga liasü.