11 buba Imchaba Master Memorial Volley asayamong tenzükogo

11 buba Imchaba Master Memorial Nagaland Open Volleyball Trophy 2016 asayamong lapokba sentong nung tongti tesemdanger, Sr. S.P. Mokokchung, Aotemsu-i onük jembiba noksa nung angur. (Mokokchung, September 20)

Dimapur, September 20 (TYO): Tanü, Mongolbar nü nungi tenzüka, Mokokchung kübok Multipurpose Sports Complex nung 11 buba Imchaba Master Memorial Nagaland Open Volleyball Trophy 2016 asayamong asayatsü tenzükogo.
Mokokchung District Volleyball Association (MDVA)-i ayongba asayamong nung telok 15 tashi takok marok agizüktsü alizüng yur toktepa shilem agitsü tenzüka lir.
Tanü asayamong tetenzükba asaya nung Adventure Club Changtongya teloki Ultimate Club Yimjenkimong telok madak takok ngua liasü.
“Volleyball asaya ya alima ajunga nung nüburtemi kanga dang sapuba asaya ka lir. Asayar kati asayadak shilem agiba ajanga tangari pa jakla yimya meteta akümer, anungji asayar shiai pei sempet tajungtiba amshia, tazüokba lia asayatsü ayongzüker,” ta asayamong lapokba sentong nung tongti tesemdanger, Senior Superintendent of Police Mokokchung, Aotemsu-i metetdaktsü.
“Asayartem ajungmesotsü nükjidong nung tan ama tongti asayamong ayongba atema tayonger danga pelar,” ta pai lemsatepa liasü.