11buba Nagaland Music Awards agitsü

August 14, 2019 nü Shack restaurant, Dimapur nung Native Trax Society-i 11buba Nagaland Music Award atema osangbenertem den jembiba noksa nung angur.

Dimapur, August 14 (TYO): November 8, 2019 nü Regional Centre of Excellence for Music & Performing Arts (RCEMPA), Jotsoma nung 11buba Music Awards of Nagaland (MAN) 2019 agitsü, aser iba award atema Native Trax Society-i nominations meshiba osang ka ajanga metetdaktsü.
August 14, 2019 nü Shack restaurant, Dimapur nung osangbenertem senden ka nung Native Trax Society-i iba osang ya metetdaktsü.
Tang mezüng Task Force for Music and Arts (TafMA) advisor, Theja Meru aser project director Dr. Hovithal Sothu na leniba nung TafMA-i 11buba Music Awards of Nagaland nungita yaritsü, ta Native Trax Society züngsem- Imli Lee aser Mengulhoulie Mepfuo nati metetdaktsü.
Native Trax Society-i iba awards atema category tasen ka nung award agütsütsü lemtetogo, aser ibaji ‘best cover song’ lir. Naga nunger kentener shilem 80-i tangari atenba ken atener (cover song), aser karibo kanga junga tenteter, ibayongji award tasenba ya densema agütsütsü lemtetogo, ta Imli Lee-i metetdaktsü.
Society-isa taküm küm atema senpet 10,000 agütsütsü aser entry fee ji sen 500 asütsü lemtetogo.
Tang mezüng entry meshitsü, kechiyong taoba mapangtem nung nisung karibo parnok ken mejungaka entry asütsü atema tenüngka agi dang tenüng agütsür, ta parnokisa metetdaktsü.
Artists, recording studios aser producer temi iba award atema tenüng agütsütsü akok. 2018 küm November 1 nungi tenzüka Nagaland nung record asüba aser mapang mashie nung sayaba original compositions entry atema temsüa lir. 11buba MAN 2019 nung award ajak agi 18 agütsütsü.
Entries ji email ajanga musicnagaland@gmail.com mesüra WhatsApp number 9089409715 nung agütsütsü akok. Iba dak alia NST colony Circular Road, Dimapur nung aliba Native Trax Society office-i tsüngdong arua agütsütsü akok, ta parnokisa metetdaktsüogo.
Entry shia nung form fill up süa sign alitsüla aser audio/music video ka (mesüra audio/video link); Hindi/local oshi nung atenba kenji (lyrics/kenjang) English oshi nung meyipzüktsüla; aser artist/band profile den noksa ka alitsüla.
Entries submit asütsü atema tatembangbuba anogoji September 21 asütsü. Awards mesüra entry atema telatetbatem dak sendakba nung osang tejangja metetnertemi 9856201694/8014263251/7005251186 ajanga metetpelatsü akok.
Lisopur ken mejemertem/kentenertem nem tetushi agütsütsü nükjidong nung Native Trax Society-i MAN ya 2009 küm tenzüka liasü.