11buba Under 14 State Level Catch Them Young asayamung tenzükogo

Rongjui/Sept 25 nü IG Stadium, Kohima nung Youth Resources & Sports, Advisor Er. Zale Neikha-i 11buba Under 14 State level catch Them Young tournament 2018 lapoktsüba noksa nung angur. 

Dimapur, Rongjui/September 25 (TYO): 11buba Under 14 State Level Catch Them Young asayamung lapokba sentong Indira Gandhi Stadium Kohima Hall ‘A’ nung Rongjui/Sept. 25 nü kaogo. Iba sentong nung Advisor, Youth Resources & Sports, Er. Zale Neikha tetushi tesemdanger asü.
District ajak nungi kaketshirtem ajungshia Er. Zale Neikha-i, Naga nunger dak saisapong balala nung jenjang temaba tongteta asayatsü asoshi sempet lir, saka mapang aben asayar tai shimba ajanga imlaba ama mataloker, ta ashi.
Kidanger state Manipur ateshia pai ashiba agi, asenok aso ajen kasa dang süaka parnokbo jenjang temaba tongtetogo. Advisor-i kaketshirtem dang asaya kanga kümdanga shimtsüla ta ashiba den meranga inyaktsüba dak alaker tanga lenmang kecha mali, ta ashi.
Er. Zale Neikha-isa, tang aliba sorkari tenüngdakba infrastructure tem yanglutsü asoshi reprangshimtsü aser Nagaland nung saisapong ajungkettsü atema tongtibangsa inyaktsü, ta ashi.
Kasa mapang nung Youth Resources & Sports, Director, Akumla Chuba-i lokti pelaa agizükba o jembidang, department-i sempet aketba lanur asayartem ajungkettsü asoshi inyaktsü merangdar, ta ashi. Dr. T.Ao, tateshitsü amshia lai ashiba agi, pa ya doctor ka liasü saka pai 1948 Olympic nung India football team anir asaya. Lai kaketshirtem dang mapa amshi shia amshitsü ajungshi.
Asayamung tenzükba sentong ya YRS, Deputy Director, Megolhu Dolie lenisüba kübok aka aser Kohima Bible College, Vice Principal Pete Krose-i sarasadema tenzük, ta Temjenkaba, IA-i sangdong ka ajanga metetdaktsü.