12 buba SAG asayamong tanü tenzüktsü

Guwahati, February 04 (Agencies): India North East kübok Guwahati yimti nung 12 buba South Asian Games asüng, Hokolbar nü tenzüktsü sentong renema lir.
India Ato Kilonser, Narendra Modi-i Guwahati kübok Indira Gandhi Athletics Stadium nung lapoktsüba sülen South Asian Association for Regional Cooperation (SAARC) nung züngsemba linük 8 nungi asayar 2,500 shi anogo 12 agia 12 buba SAG asayamong nung toktepa shilem agitsü.
South Asian Olympics Council (SAOC)-i ketdangsüa ayongba 12 buba SAG asayamong ya mezüngbo New Delhi nung 2012 küm asayatsü sentong renem saka iba mapang Assembly elections agiba yong sentong renemba ama asayamongji masayateti süidaktsü.
Iba sülen, International Olympic Committee (IOC)-i December 2012 nungi February 2014 tashi IOC nung medendaktsüi Indian Olympic Association (IOA) merenshiba yong küm 4 sülen ang tan asayamong ya India North East kübok Guwahati aser Shillong na nung asayatsüsa jenjang ajurur lir.
Asayamong tenzüktsü anogo ka anünga alidang International Basketball Federation (FIBA)-i tan asayamong nung basketball masayadaktsütsü lemtetba ajanga tetsükdakba tulu ajurua lir.
Tan asayamong nung shilem agir linüktemi tan February ita 11-16 nü asayatsü renemba basketball tetoktepba nung shilem magitsü tetuyuba ka FIBA agütsüogo.
FIBA-i Basketball Federation of India (BFI) telok ka aser IOA-i BFI telok tanga ka agizükba ajanga iba tetsükba ya ajurua lir.
Ajisüaka, tarutsü anogotem nung tangatettep kati arua sentong renemba ama, basketball tetoktepba agitsü imlaba olen ka asayamong tayongeri metetdaktsüogo.
Bangladesh yimtiba, Dhaka nung tesüsa 2010 küm ayonga asayaba SAG asayamong nung India teloki gold 90 anguba densema, ajak agi medal 175 tashi agizüka liasü.