12 buba SAG: India teloki temaba jenjang angur

12 buba South Asian Games asayamong tetsür temang touzük seret 60 taret wrestling tetoktepba nung India tsür, Manisha (Tiyongtsü)-i gold; Bangladesh tsür, Rina Akhtari (Abelen)-i silver aser Sri Lanka tsür, MWDM Priyanga Kumari-i bronze medal agizükba noksa nung angur. (Guwahati, February 06)

Guwahati, February 06 (Agencies): 12 buba South Asian Games (SAG) tetenzükba anogo nung, tanü Honibar nü, India’er wrestlers, swimmers aser weightlifter-temi takok tulu ngua par India telok temaba jenjang nung ajungkettsüogo.
India teloki gold 14 aser silver 5 densema, ajak agi medal 19 tashi tanü agizüka tan asayamong nung shilem agir telok tarensen nung temaba jenjang angu.
Medal timba, 21 tashi agizükaka, Sri Lanka teloki gold medal 4 dang agizükba yong par teloki India sülen anidaka tanabuba jenjang nung lir.
India nunger melangtepertemi gold medal 5 agizükba den külemi, tzüwartemia gold 4 aser silver 3 agizüka liasü.
India’er weightlifter-temia gold 3 agizükba aser cycle toktepa anishirtemi gold 2 aser silver 2 agizükba osang jangjaogo.
Melangteptsü shilem nung Rajneesh aser Ravinder nati tebur temang touzük seret 65 aser 57 taret na indang gold aser tetsür shilem nung Priyanka Singh, Manisha aser Archana Tomar nungeri temang touzük seret 48, 60 aser 55 taret indang gold agizüka liasü.
Tzüwatsü shilem nunga Sandeep Sejwal-i tebur 200m breaststroke, Shivani Kataria-i tetsür 200m freestyle aser Damini Gowda-i tetsür 100m butterfly shilem nung gold anguba den külemi, tetsür 100m freestyle relay teloki asayamong otsü tasen yanglua gold agizükba osang jangjaogo.
Weightlifting shilem nung Saikhom Mirabai Chanu-i tetsür temang touzük seret 48 taret, Harshdeep Kaur-i tetsür temang touzük seret 53 taret aser Gururaja-i tebur seret 56 taret indang gold agizük.
Cycling shilem nung Manipur tsür 2 – Tourangbam Bidyalaxmi o Elangbam Chaoba Devi nati tetsür 30km individual time trial tetoktepba gold aser silver medal India asoshi agizüktsü.
Arvind Panwar aser Majeet Singh natia tebur 40km individual time trial nung gold aser silver agizüka liasü.
Shillong nunga India’er lasang toktepa kashishirtemi gold 4 aser silver 4 agizükba osang jangjaogo.
Sri Lanka telokia gold 3, silver 5 aser bronze 3 agizükba den külemi, Pakistan teloki silver 1 aser Bangladesh teloki bronze medal 4 agizüka liasü.
Ano külen, Megahalaya kübok Shillong nung tentetba Jawaharlal Nehru Stadium nunga 12 buba SAG asayamong lapokba sentong tanü agiba osang jangjaogo.
Shillong nung agiba asayamong lapokba sentong nung Meghalaya Chief Minister, Dr. Mukul Sangma; Union State & Sports Affairs Minister, Sarbananda Sonowal; Vice Chairman, Games Technical Coordination Committee, Indian Olympic Association, S. M. Bali; Meghalaya Sports & Youth Affairs Minister, Zenith Sangma aser tan asayamong nung shilem agir telok 8 nungi asayartemi shilem agia liasü.