12 Buba South Asian Games (SAG)

Guwahati, Assam, Indira Gandhi Athletics Stadium nung India Ato Kilonser Narendra Modi-i 12 Buba South Asian Games (SAG) lapoktsüogo.
Iba asayamung ya anogo 11 tashi Guwahati aser Meghalaya yimtiba, Shillong nung kadagi. SAARC linük 8 -India, Pakistan, Sri Lanka, Bangladesh, Afghanistan, Nepal, Bhutan aser Maldives linüktem nungi arua saisaponger 2,500 dak temai shilem agidagi.
Ajak agi asaya tapu balala 228 asayar aser asaya 23 sports discipline yimya nung asayar. Tan agi India nung tasembenbuba iba asayamung ya ayonga asayar asütsü.
SAG ya küm ana nung khen South Asian (SAARC) linük 8 nungi adenshia asayar. Aser ibai South Asian linüktem Olympic saya ama ka asayar.
Tamalenbo iba asayamung dang ya South Asian Federation Games ta tenüng jar asaya aru saka 2004 küm nungi ‘South Asian Games’ ta tenüng melener tanü tashi asaya arur.
1984 küm mezüngbuba SAG ya Kathmandu, Nepal nung asaya tenzük.
India nunga tan agi asemben iba asayamung ya akar, mezüngbuba 1987 küm Kolkata (West Bengal), 1995 küm Chennai (Tamil Nadu) aser tasemben bubaji tan Guwahati aser Shillong nung asayadagi.
Tang tashi SAG asayamung nung India-i temaba jenjang nung asayaa arudar. India 900 Gold, 542 silver, 286 bronze medals aser ajak agi 1,728 medal nguteta lir. Tanabubaji Pakistani 311-375-336 aser tasembubaji Sri Lanka-i 185-245-455 ta nguteta lir.
Taküm SAG Omenji ‘Play for Peace, Progress and Prosperity’ lir aser Official mascotji Kaziranga National Park, Assam nung tezü ka aketba kentok ‘Tikhortemaitsü sayua yanglu.