12th Imchaba Master Memorial Nagaland Open Volleyball Trophy

Sakutemjen Memorial Club Chungtiayimsen-i benogo

Mokokchung, Sept 30 (TYO): September 26 nungi 29 tashi yangi Mokokchung multi-purpose sports complex nung 12 buba Imchaba Master Memorial Nagaland Open Volleyball Trophy 2017 asayaogo aser taküm iba asayamung marok Sakutemjen Memorial Club Chungtiayimsen-i bener ogo.
September 29 nü tesüsabuba asaya Sakutemjen Memorial Club Chungtiayimsen o Tongden Club Chungtia ‘A’ na asayaba, SMC Chungtiayimsen-i best of five yimya nung points 25/20, 25/16 aser 25/17 agi Tongden Club madak takok ngua taküm parnoki champion benogo.
Tasembuba jenjang atema Young Stallone Club Akuluto aser Sporting Club Mangkolemba na asayaba Young Stallone Club-i best of three yimya nung points 25/23 aser 25/12 agi akok.
Mezüng jenjang angur nem tanga senpet sen 70,000/-, tanabuba jenjang nem 50,000/- , tasembuba nem 20,000/- aser pezübuba nema 15,000/- agütsüogo.
Nija senpet; Best Setter of the tournament-ji Tongden Club Chungtia ‘A’ nungi Mr. Imsüwari agizük, Best Spiker of the tournament-ji Sakutemjen Memorial Club Chungtiayimsen nungi Mr. Imlichubai agizük aser Man of the tournament-ji Young Stallone Club Akuluto nungi Mr. Kito Zhemomi-i agizüka liasü. Parnok ajak nem senpet sen den kuli kaket kaka agütsü.
Taküm iba asayamung nung Mokokchung district dang masü Zunheboto, Peren aser Tuensang district nungi densema telok ajak agi 17-i shilem agi. Iba asayamung shibangba sentong nung I. Meyionen, Director & DIG Vigilance & Anti Corruption Nagaland Kohima tongti tesemdanger liasü.
Iba asayamung ya kümshi Mokokchung District Volleyball Association (MDVA)-i lanurtem volleyball asaya tsütsü sabang lapokja ajungshitsü nükla yur ayongzüka akar aser iba asayamung ya Nagaland nungbo asayamung tulutiba rongnung ka ta züngshir.