13 buba NLA election: Vote agütsür lakh 11.76-i tanü shilem agitsü

Kohima, Tsüklai 26 (TYO): Asüngep 7:00 ako nungi 13 buba Nagaland Assembly election atema polling agitsü aser iba mapang vote agütsür nisung lakh 11.76 dak temai candidate 195 nungi 59 shimtsü.
Nagaland nung vote agütsür ajak agi nisung 11,76,432 lir aser iba nung tebur 5,97,281 aser tetsür 5,79,151 dena lir.
Tan election nung mezüng atema vote agütsütsüpur nisung 26,900 lir aser parnokji arishi küm 18-19 purtem lir, ta Assistant Chief Electoral Officer, Awa Lorin-i tanü osangbener senden ka nung ashi.
Assembly menden 59 atema candidate 195 lir aser Kohima district kübok 11-Northern Angami-II Assembly Constituency nungibo taoba Chief Minister Neiphiu Rio den tetokteper shinga melii takok nguogo.
Polling station 2156 aliba nungi 1062 (critical), 530 (vulnerable) aser 564 (normal) ta ajiteta lir, ta Awa Lorin-isa metetdaktsü.
Assembly election atema security dak sendakba mapa asoshi Central Armed Police Force company 281 den state police tem mapa lemzükja lir, ta Chief Electoral Officer Abhijit Sinha-ia ashi.
Polling mapa atema sorkar mapa inyaker 17,523 tashi mapa lemzüktsüogo. Parnok den election observer 55 lir aser parnokji General observer 22, Expenditure observer 22 aser Police observer 11 lir. Maneni mirco observers 442 shima lir, ta CEO-isa shisem.
Election district 12 kübok polling station 2053 nung anepdang 7:00 ako nungi nikongdang 4:00 tashi polling agitsü. District 6- Kiphire, Mon, Phek, Tuensang, Wokha aser Zunheboto kübok polling station 103 nungbo polling party tem Returning Officers office-i meyipa arutsü atema nikongdang 3:00 ako nung tembangtsü, ta paisa metetdaktsü.
Tan election nung Electronic Voting Machines (EVMs) den Voter Verifiable Paper Audit Trail (VVPAT) amshitsü, ta Abhijit-isa ashi.
Constituency 26 kübok polling station 178 nung tetsür temeja polling ketdangsertem alitsü aser Wokha district kübok polling station ka nungbo Persons with Disabilities (PwDs)-i dang reprangtsü, ta paisa metetdaktsü.
Nagaland kübok tongtipang sector 280 nung Sector in-charges aser striking force mapa lemzükja lir aser polling station ajunga nung CCTV surveillance alitsü aser CAPF personnel-i anüktsü.
13 buba NLA election dak sendakba nung nisung ka asü aser 23 yiru. Village council temi candidate shimteta vote agütsütsü tetuyuba agütsüba ajanga law & order nung timtem ajuru. Iba asoshi yimtsüng kar anema FIR tem benoka lir, ta CEO Nagaland-isa ashi.
Mokokchung district ajunga nung 144 CrPC ozüng agüja lir aser ano iba kasa ozüng ya Wokha district kübok tesem kar nung, Kohima district kübok Tseminyu sub-division nung, Phek Town aser Dimapur district kübok Dhansaripar sub-division nunga agüja lir, ta paisa metetdaktsü.
Election dak sendakba lendong balala asoshi FIR 41 benoka lir aser nisung 81 puogo. Tai tonglokja alir 46 anema non-bailable warrants agütsüogo, ta Abhijit-isa shisem.
Election mapang tesem balala nung mita reprangdang sen crore 1.4 crore dak tema den yi litre 41,000 shi puogo, ta paisa ashi.
CEO-isa vote agütsür ajak dang tetsübu aser tarendakba kecha melii vote timi agütsütsü atema mepishia metetdaktsü.
Additional CEO N Moa Aier-ia ashiba agi, public senzüsenbongtsü atema garitem tenokdangba kecha mali, ajisüaka political party tem aser candidate temi vote agütsürtem anishitsü atema garitem mamshitsüla.