ASUD-i ayongba “Morung Fest 2015” tenzükogo

Dimapur, December 03 (TYO): “Vibrance of the Nagas” omen nung ajemdaker, Ao Students Union Diphupar (ASUD)-i ayongba “Morung Fest 2015” ananümung sentong, tongti tesemdanger, Lok Sabha MP Neiphiu Rio-i Brihostibarnü Agri Expo site, 4th mile, Dimapur nung lapoktsüogo.

Sentepa aliba nüburtem den jembiba mapang Rio-i, Nagaland nung Aor ya kin ajak rongnung tongtibangtiba lir aser state sorkari Mokokchung district ya “Pioneering district” ta züngshir kechiba süra kaketshitsü aser tamangba yimsü ajak iba district nung mezüng tenzük. State nung tanü Aorji kin ajak dang temaba aser inyakyim balala ajanga state aser nüburtem nem Aori tajangzük aika bentsür arur, ta ashi.

Kin ajak sentepa aliba yimti, Dimapur nung ASUD-i iba sentong ayongzükba ajanga temulung kanga ajungmesor, ta ashidang pai, iba ama sentong tajung ajanga nüburtem tsüngda tesendaktep tali akhanga akümtsü aser sobaliba yimya balala den chiyungtsü achiyim balala sayuteptsü asoshi maongka lapoktsür, ta ashi.

State sorkari sen crore aika entoka tang Hornbill festival amung tialung nung kaketshir telungjem kati sobaliba benjung ayonga amungba ajanga tejangraba tulu bentsür arur. ‘Commercial hub of Nagaland’, Dimapur nung industry tulu aser entrepreneur takar kar ali asübo iba ama sentong sen nung sen tsütysü metsükdaki nungteta bener otetla, ta paisa ashi.

Pai kaketshirtem dang pei nükjidong atongtsü asoshi kanga nendaka inyakang ta ajungshi aser tan ya tetenzüker ser tarutsü nung iba sentong tali tajungba amungtsü imlar, ta shisem.

Pai ashiba agi, Naga nunger sobaliba kanga takar, ajisüaka Naga yimten tebilemtsü tulu aliba ajanga imlaba ama renloka bener moteter. Asenok ang lungjemtetra tesüngmangtsüka inyaktettsü. Anungji iba ama benjung bentsü amungba ajanga asenok teti asoshi lungjema akümtsü aser asenok ajaki metetba Naga nunger nükjidong tongtettsü. Tarutsü nüburtem asoshi terenlok bener arutsütsü asoshi state nung telungjem, tebilemba tajung aser yimjung alitsü nüngdaker.

Sentong nung tetushi tesemdanger MLA, Kuzholuzo Nienu (Azo)-i, iba sentong ajanga Naga nunger ajak sabang ka nung lungjemer kin o kin na anemtepba anena, yimjung nung alitsü nükjidong sayur, ta ashi.

“Morung Fest 2015” nung teka mapa balala aser Naga nunger chiyungtsü tapu balala angutsü. Iba benjung ajanga lanurtem mapa tamajung nungi aniena inyaksangshi balala nung mazüngi lidaktsütsü tebilemba lir.

Kasa sentong nung Lt Gen. KJ Singh, AVSM aser Diphupar Village Council nungia o jembi aser Urban Development Advisor, Sungit Jamir-i ‘morung indigenous food contest’ lapoktsü. Iba den külemi tetushi tajaoker Minister for R&B, Vikheho Swu-i volleyball tournament lapoktsü.