13buba NLA senden nung taoba mapang züngsemtem bilemtet

Kohima, February 22 (TYO): 13buba Nagaland Legislative Assembly session tasembuba nung Deputy Speaker, Zhaleo Rio-i yaküm September 22 nü asür, taoba mapang Deputy Speaker, Imtikumzuk Longkumer bilemteta jembi. Pa arishi küm 51 liasü, aser pai kinüngtsü den jabaso ka aser jala pezü toktsür pila.
Yashi NLA senden nung Deputy Speaker-i, 2008 küm Imtikumzuk-i yimtenren nung ajemok aser 2013 küm pa mezüng MLA akum; iba sülen pa NLA nung Deputy Speaker inyak aser 12buba NLA nung Information & Public Relations Parliamentary Secretary inyak, ta metetdaktsü.
2018 küm pai Nationalist Democratic Progressive Party ticket nungi state assembly elections nung toktep aser tanaben shim. Iba sülen pa Excise & Sericulture Advisor teinyakdak nung alima nungi pila.
Zhaleo-isa, “1993 küm Imtikumzuk-i ACYC nung general secretary ka ama yimtenren nung ajemok; 1998-2003 mapang pa Chief Minister, SC Jamir atema PS inyak. Pa asüba ajanga Naga nungeri lanur takotet lenir takok ka aoksaogo,” ta metetdaktsü.
Taoba mapang minister aser pezüben tashi MLA, K Yamakam mapang tatsüka shirangba sülen Dimapur nung aliba nija hospital ka nung asü, aser pa bilemteta Deputy Speaker, Zhaleo-i, pa arishi küm 89 liasü aser pai kinüngtsü den jabaso pezü, jala pezü aser semchir 19 toktsür alima nungi pila, ta metetdaktsü.
Zhaleo-i, Yamakam ya atong-atonga 1989-2003 tsüngda 58 Shamator-Chessore assembly constituency nungi pezüben tashi shim; pa ya Tuensang district kübok Sangphur yimdak nungi lir; pa soil & water conservation, sericulture minister (1993) aser horticulture, sericulture, relief & rehabilitation Minister (1998) inyaka liasü, ta metetdaktsü.
Iba dak alia asür Yamakam-i 1950s mapang nung Sangphur Students Union tenteta liasü; pa Yimchunger Tribal Council (YTC) nung executive züngsem liasü aser tesülen YTC advisor inyak; pa Dobashi-a inyak aser 1970s mapang nung Head Dobashi akum, ta paisa metetdaktsü.
Deputy Speaker-i, asür Yamakam ya “tebuti ka mesüka liasü aser tasütait yimsüsür ka liasü,” ta metetdaktsü.
Iba sülen NLA züngsemtemi minute ana mokremer asür ana nem akhüm aguja liasü.