14buba Mumbai Marathon : Alphonce Felix Simbu, Bornes Kitur Chepkirui nati takok angu

Mumbai, January 15 (Agencies): Deobarnü 14buba Standard Chartered Mumbai Marathon (SCMM) asemogo. Nisung aikati iba sentong nung jangrabangra arua shilem agi. Item rongnung nüngtugu asayartem, shishilembartem aser wadang balala nung ameta aliba nüburtem jenti liasü.
Full Marathon nung Tanzania nungi arishi küm 24 tain, Alphonce Felix Simbu teburtem rongnung takoker liasü, aser tetsür rongnungi Kenya nungi arishi küm 31 tain, asemteper Bornes Kitur Chepkirui liasü.
Full Marathon Asemteper 6000 dak tali liasü. India nunger rongnungi Full Marathon asemer rongnung tebur nungi arishi küm 31 tain, India sepia Kheta Ram aser tetsür rongnungi Jyoti Shanker Gawte temaba jenjang nung liasü.
Half Marathon (21.097-km), nung tebur nungi G. Lakshmanan aser tetsür rongnungi Monika Athare nati takok angu. Bollywood star John Abraham-i tena nem tenüngsang agütsü.
SCMM nung taküm nisung timtiba shilem agi. Full Marathon (42.195-km) asemer tetsür aser tebur ajak senteper 6,342 aser half Marathon asemer ajak agi 14,663 liasü. Dream run nung shilem agirtem 19,980 liasü, item rongnung bendangertem, Olympic nung asayartem aser defence force tem nungi dena shilem agi.
Shishilembartem, the Asian Heart Institute, NGO balala aser lokti tentet balala nungi iba sentong nung pei akok yari shilem agi. Iba ya Asia nung Marathon asemtepba rongnung sen timtiba agütsüba tetoktepba ka lir.
India nunger athlete tem rongnungi Elam Singh, Mohammed Yunus aser Ladakh nungi Jigmet Dolma aser Tsetan Dolkar nungertemi shilem agi.