15 buba Nagaland State ‘A’ Chess championship tenzükogo

Kohima, June 14 (TYO): Tanü, Mongolbar nü nungi tenzüka Kohima kübok Red Cross Society Conference Hall nung agiba 15 buba Nagaland State ‘A’ Chess Premier 2016 tetoktepba nung chess asayar 20 tashi shilem agitsü tenzüka lir.
Nagaland Chess Association (NCA)-i ayonger agiba tetoktepba nung Mughaho Awomi, Ketholelie Nisa, Melesai Dawhuo, Sede Nagi, Sukhavi Achumi, Viseyie Yano, Hekugha Heka Yeptho, Bovito Yeputho, Visanyuzo Kuotsu, Toivi Yeps, Vekukho Soho, Kevilekho Zumvu, Setso Peseyie, Kughaho Kiho, Thepfuchalie Mere, Tokuho Awomi, Denis Angami, Neikehiezo Zinyu, Helie Rupreo aser Toikhu Awomi nungeri takok marok agizüktsü asoshi kanga meranga asayatsü tenzükogo.
“Asen tekolok aser temang na aroki lungjemer mapa inyaker. Anungji, chess asaya ya tokolok rendaktsüba asaya tajung ka lir,” ta tetoktepba lapokba sentong nung tongti tesemdanger, Nagaland Parliamentary Secretary, Fire & Emergency Service & New & Renewable Energy, Toyang Changkong Chang-i metetdaktsü.
“Nisung tekoloki langa bilema tananen makai mapa inyakba ajanga dang tekolok meraksai mapa inyaktsü,” ta pai lemsatepa liasü.
Ano, Chess asaya nung lanur aser tain nisung ajungai kanga jangrabangra shilem agiba atema pela olen ka tongti tesemdangeri metetdaktsü.
“Nagaland nung lenir aser tulurtemi tongti shilem agiba ajanga lanurtem ajungmesor,” ta shia, tarutsü mapanga lenirtemi iba amala tetoktepba balala nung tongti shilem agitsü imlaba olen ka Toyang-i sangoktsü.
“NCA-i kümshi tongti chess asayamong ana tashi ayonga agir. Ajaki shilem agitetba State Chess Challenger asayamong nung takok angur asayar 16 tashi shimer külen taoba asayamong nung temaba jenjang angur chess asayar 4 den aroki lungjemer parnok 20 tashi State ‘A’ Chess Premier asayamong nung shilem agidaktsür,” ta NCA Tir, K. Sekhamo-i osang jangjashitsü.
Paisa ashiba agi, State ‘A’ Chess Premier tetoktepba nung temaba jenjang angur asayar 4 shima parnok Nagaland tenüng nung taruba July ita 8 nungi tenzüka Noida nung agitsü ayongba National Chess Challenger tetoktepba nung shilem agitsütsü sentong lir.
NCA-i ketdangsüa, Nagaland Chess asayartemi National tetoktepba den kümshi agiba North-East Championships nung toktepdaktsütsü sentong aliba osang ka paisa metetdaktsü.
NCA-i tanü tashi nung International Elo jenjang ajangzüker chess asayar 15 tashi aniteta lir aser parnok rong nung Ruguolie Angami-i Nagaland nungi International Elo jenjang mezüng ajangzüka liasü.
NCA-isa anitetba chess asayar, Mughaho Awomi-i 2010 küm Delhi, 2011 küm Jammu aser 2014 küm Hyderabad nung ayongba under 2000 jenjang angur shilem tetoktepba nung champion asemben tashi akümba osanga bushitetogo.
“Nagaland sorkari chess tesayur inyaktsü asoshi ni shimba atema pelaba lemsateper,” ta shia, USA, Russia, China aser Europe nung tentetba linüktemi chess asaya ya par kaketshisatsü bushitsü shilem tongti ka kümdaktsüba osang Sekhamo-isa metetdakja liasü.
India nunga, Tamil Nadu, Gujarat, Andhra Pradesh, Delhi, West Bengal aser Assam nunger densemba state-tem indang kaketshisatsü sayutsüren nung chess tongti shilem ka kümdaktsüba osang bushitetogo.
15 buba Nagaland State ‘A’ Chess Premier 2016 tetoktepba ya tan June ita 17 nü tembangtsü.