15 buba Nagaland State Chess Challenger tenzüker

Kohima, May 23 (TYO): Nagaland Chess Association (NCA)-i ayonger külen Kohima nung 15 buba Nagland State Chess Challenger tetoktepba tanü, Hombar nü nungi tenzüka asayatsü tenzükogo.
Iba tetoktepba sentong ya Kohima District Rural Development Agency nung Project Director, Kevipodi-i Kohima kübok Red Cross Society Conference Hall nung tanü tenzüktsü.
Anogo 4 agia asayatsü ayongba tetoktepba nung chess asayar ajak agi parnok 45 tashi shilem agitsü tenzüka lir.
Asayar 45 rong nungi parnok 11 tashi Under-16 (U-16) shilem aser tanüngba asayar 34-i Open shilem nung toktepa shilem agiba osang jangjaogo.
“Tan shilem agir asayar 45 rong nungi parnok 16 tashi shima, taruba June ita asayatsü ayongba Nagaland Chess ‘B’ Championship nung toktepdaktsütsü sentong lir,” ta tan asayamong nung Chief Arbiter, Mugaho Awomi-ia metetdaktsü.
Tetoktepba tenzükba sentong nung NCA President, K. Sekhamo-i pela agizükba onük jembi; NCA General Secretary, Denis Angami-i tepelo o lemsatep aser Sulivi Assumi-i ken ka tena sentepa alirtem ayongzük.