16 Point Agreement ajanga Naga nunger taginüba tuluka tongtsüogo : NPCC

Kohima, May 25 (TYO) : Nagaland nung Congress telok makümdang, Nagaland People’s Convention (NPC) aser Naga Nationalists Organisation (NNO) teloki Naga nunger taginüba tuluka atalokdakja inyaktsüogo ta tanü Bodbar nü Nagaland Pradesh Congress Committee (NPCC) sangdong ka ajanga metetdaktsüogo.

Parnokisa ashiba agi, NPC ajanga India sorkar den renemba 16 Point Agreement ajanga Naga nunger taginüba tuluka tongtsüogo aser kasa tangatetba nung tanüa Congress teloki maneni Naga yimten tebilemtsü ya yimjung nung temzüng ajanga latettsü asoshi merangba tangatetba nungi mainshii nokdaka lir.

NPCC-i iba ken o ya yashi-yakanü Nagaland nung taoba Home minister aser taoba speaker, Wb.Thenuchoi züluba onük kar jangjashija sangdongba osang ka nung metetdaktsü.

Wb.Thenuchoi Nagaland nung ‘Regional party’ indang züluba nung shitak karbo lir saka pai metetsümonga NPC aser NNO teloki inyakba tajungtembo odang toktsü ta NPCC-isa metetdaktsü. NPC ajanga 16 Point Agreement renemba aija metetdaktsüdang, asür A.Kevichusaibo 16 Point Agreement- ji ” mejungi meshizükba mapa ka liasü” ta aitsü saka Regional Party-i tajungba meshizükba mapaji kechika asütsüar tanü tashibo mangur ta NPCC-isa metetdaktsü.

16-Point Agreement ajanga Naga nunger yimtenren nung taginüba tuluka tongogo, iba jagi tanü tashi center sorkari Naga nunger atema State List, Concurrent List aser Art 371(A) nung aketba maparentem nung kecha telemtetba magir. Asenoki meinyaktetba ajanga dang asenok Delhi dak nendaka alitsüsa akümer ta Congress telokisa metetdaktsü.

” Nagaland state akümertem dang onoki kanga pelar, 16 Point Agreement yanglutsübaji mapa tasak liasü saka aitsütsübo melamelar liasü. 16 Point Agreement ajanga dang Naga nunger asoshi tarutsü jenjang yanglutsü. 16 Point Agreement ya ka merenemtet asübo, asenok ya tang tashi Assam nung District ka sür yimten nüchiso asoshi raraya lila,” ta NPCC-isa metetdaktsü.

Nagaland state kümer sülen a NNO lenirtemi Naga nunger lenirtem rongnung 16-Point Agreement magizüktetertem nem dena maongka agütsütsü asoshi ato kilonser Pt. Jawaharlal Nehru dang mepishia FGN/NNC telok den Sept.06, 1964 nung yimjung yanglu. Iba yimjung yangluba sülen tia mejungi Nehru süa adok, saka par jala Indira Gandhi mapang FGN den trokben tashi senden lia Naga yimten tebilemtsü latettsü asoshi meranga liasü. Iba mapa nungitba temaitsü sayua Democratic Party of Nagaland (DPN) telok nungi tatar tenet parnoksasa tatar menden nungi anen saka tia mejungi telatetba kati marutet ser FGN rongnunga telemsa adok kari Revolutionary Government of Nagaland aküm ta NPCC-isa metetdaktsü.

Iba sülen parnok jagi  President’s Rule mapang Nov.11, 1975 anogo nung Shillong Accord renem. Iba Shillong Accord renemba tenüngji UDF teloki agi aser iba Accord ajanga Naga nunger linük tenzükertem tepuokdak balala nung puoka alir 700 dak tali chiok, ibayongji nübortemi UDF dang pelaba agi 1977 küm election nung adokdakja sorkar aküm ta Congress telokisa jangjatsüogo.

Shillong Accord renemba sülena Nagaland tensa mejungi aküm aser iba mapang ka nung 1991 küm May 18 nü Rajiv Gandhi den pa kinungtsü Sonia Gandhi dena Dimapur tonga aru aser Naga yimten tebilemtsü latettsü asoshi kecha ‘condition’ meyui ken o jembi tenzüktsü nangzük aser iba tenangzükbaji mapa küma 1996 küm February 22 nü ato kilonser P.V.Narashimha Raoi Naga yimten tebilemtsü ken o kecha ‘condition’ meyui jembitsü ta metetdaktsü. Iba tejang atangbaji tanü Ceasefire nung ken o jembi tenzüktetba ya asütsü. Item ajakji Congress teloki Naga yimten tebilemtsü latettsü asoshi inyaktsü nangzükba tejangtem lir ta Congress telokisa metetdaktsü.

Tang tashi nung Nagaland nung regional political party ajanga inyaktetbaji “Shillong Accord” ya dang lir, iba dakji alakabo parnok meyong kiojen, hotels aser ali dang angutsü ta Congress telokisa metetdaktsü.

Nagaland nung Congress makümdang, NNO teloki 1972 küm Pfütsero mungdang nung lemtetba ama, Naga yimten tebilemtsü ya yimjung nung linük temzüng ajanga latettsü asoshi maneni merangtsü ta Congress telokisa metedaktsü.