16 Point Agreement onüktem ya asenoki yanglu : Dr.S.C. Jamir

December 10, 2020 nü Senden Reju Dimapur nung Ao Senso Telongjem Dimapur lokti senden aliba mapang Wb. Dr. S.C. Jamir ASTD lenirtem den agiba noksa ka yangi angur.

Dimapur, Dec.10 (TYO) : Naga lima yimten tensa kanga mejungi aliba nungi kümzüktsü asoshi Nagaland state akümba onük 16, koba dang 16 Point Agreement ta ajar, item onüktem ya tangari zülutsüba masü saka Naga nunger kin shia teshimtet purtemi shisa bendena züluba lir aser item rongnung asenok Ao kin nungia lenir Dr.Imkonglibai anir Wb.N.I Jamir, Wb.Yajen Aier aser Sashimeren Aier nungertem liasü ta tanü Dr.S.C.Jamiri metetdaktsü.
Pai iba o ya Senden reju Dimapur nung tanü Yantepnü (Brehostibar) Ao Senso Telongjem Dimapur lokti senden nung tajungshi o jembidang metetdaktsü.
Nagaland state akümba mapang ya Naga nunger India sepai ket nung reshikangshi timtem ajuruba mapang ka liasü aser item timtem nungi kümzüktsü asoshi Aor lenir Dr.Imkongliba aser Rev.Longri nunger amai anir Naga nunger asoshi taküm ajak bendanga agüja inyakogo ta paisa tamalen Aor lenirtemi Naga nunger ajungtsü atema inyakba mapatem bilemteta lemsatep.
Nagaland state akümba onük ya 1947 küm Naga National Council o Assam Governor Akbar Hydari na tsüngda renemba onük 9, koba dang Nine Point (Akbar Hydari) Agreement ta ajar, iba nungi tongtibang onüktem agiteta renem. Iba 9 point renemba onük nunga NNC tenüng nung NNC tir Wb.T.Alima Imti-i sign asü. Ajisüaka, iba tangatettep onüktem ya center government-i memelungba agi mapa küma moutet.
Mezüngbo, 16 Point Agreement ajanga Nagaland ya India telongjem küboksa süaka External Affairs kübok liasü aser tang tashi Nagaland ya India telongjem nungsa süaka tangar state-tem dang nungi jenjang balaka tema nung alitsüsa India temzüng arla 371(A) nung temeten aika agüja lir ta Nagaland state akümertem rongnung tang tashi arshia taküm alisang Dr.S.C.Jamirisa metetdaktsü.
Oboula aser obala nunger, Aor lenirtemi Naga nunger kintem nem Tsüngremer osang tajung den kaketshisatsü agüja anitetogo aser yimten nunga taküm ajak bendanga agüja tenzükogo, anungji tanüa Aortem rongnung telemsa melii ka küma longjemer Naga nungertem len tajungi aniangma ta Wb.Dr.S.C.Jamiri ajungshia metetdaktsü.
Tanü ASTD lokti senden nung taruba küm asem asoshi tongti ketdangpurtem shimogo. Itemji tir Wb.Meren Nokpu (Nokpu), tadong tir Wb. Imtisangba (Süngratsü), tongti zülur Wb.P.Nükensashi Longchar (Khensa), repsem zülur Wb. Temsümongba (Molungkimong), Senotsü ketdangser Wb. Imtilepzük (Longkong) aser Senotsü ketdangser yariba Wb.Takuba Longpayimsen liasü. Parnok den tsükong shia nung Sanen Luden züngsem shimtetogo. Item tongti ketdangpur tasentem asoshi tashi aser temoatsü meshija Dimapur Ao Baptist Arogo nung sannüker Rev.I.Watii sarasademtsü.
Tanü iba lokti senden nung shilem agirtem ajak dang pelaba o ASTD tir Wb.L.Wati Jamiri metetdaktsü.