17 buba LSU Martyrs’ Trophy asayamong tenzükogo

Director, Land Resources, Mhathung Yanthan-i ball metsüdoka 17 buba LSU Martyrs Trophy asayamong tenzüktsüba noksa nung angur. (Achijilen) Asayamong lapokba sentong nung shilem agir kaketshirtem indang noksa angur.

Wokha, April 14 (TYO): 17 buba Lotha Students’ Union (LSU) Martyrs’ Trophy asayamong Wokha kübok local ground nung tanü, Brehostibar nü tenzükogo.
Tanü asayamong lapokba sentong nung Nagaland sorkar kübok Land Resources Department nung Director, Mathung Yanthan tongti tesemdanger liasü.
“Kaketshir mapang ya kanga dang tatsü anungji, kaketshir shiai pei mapang kanga kümdanga amshitsüla. Ano, kaketshir shia alizüng tajung ayur, khuret abener senso aser lenir tajung kaka akümtsü ajungshir,” ta tongti tesemdangeri tajungshiba olen ka lemsatep.
“LSU-i saisapongba ajanga asür kaketshir lenirtem bilemtetba atema pelaba metetdaktsür,” ta shia, kaketshir aser asayar shiai kaketshir jenjang tajungba kümdaktsütsü mechi taoba lenirtemi pei taküm tenla agütsü ta teti bilemtettsü tajungshiba olen ka Wokha Deputy Commissioner, A. Robin Lotha-ia metetdaktsü.
“LSU tenüng nung pei taküm tenlar kaketshir lenir, asür Thungkhomo Ezung aser asür Chumdamo Tungoe na nüngtem nung LSU-i kümshi Martyrs’ Trophy asayamong ya ayonga agir,” ta LSU Tir, Amos Odyuo-ia asayamong otsü metetdaktsü.
Assam police-i tesüiba SDO (C), Ralan amokmerena merenshiba anemer ta sayutsü nükjidong nung LSU-i longkak aitdang Assam police-i asür Thungkhomo o Chumdamo na 1977 küm April ita 14 nü tepsetba osang bushitetogo.
Tan asayamong nung ajak agi telok 12-i toktepa shilem agiba osanga jangjaogo.