17 buba NSF football asayamong nung telok 66-i shilem agitsü

Kohima, September 22 (TYO): Tan September ita 24 nü nungi tenzüka, Kohima kübok Kohima Local Ground nung asayatsü ayongba 17 buba Naga Students’ Federation (NSF) Martyrs’ Memorial Football Trophy asayamong nung telok 66 tashi shilem agitsü renemba osang ka tayonger luden nung Convenor, Neingrotuo Krose-i tanü sangdong ka ajanga metetdaktsüogo.
“NSF asayamong ya Angami Students’ Union  (ASU)-i ‘Goal for Peace’ omen nung ajemdaker kümshia ayongba tongti asayamong ka lir,” ta pai ashi.
Nagaland Parliamentary Secretary, Municipal Affairs & Economics & Statistics, R. Tohanba-i lapoktsüba sülen Meriema Youth Organisation aser Dejavu Football Club telok na tsüngda asayamong tetenzükba asaya asayatsü renema lir.
Ita 1 shi agia asayatsü ayongba asayamong nung Kohima nungi telok 49, Dimapur nungi telok 6, Peren nungi telok 3, Phek nungi telok 4 aser Manipur state nungi telok 4 densema, ajak agi telok 66 tashi takok marok agizüktsü atema toktepa asayatsü renemba osang angazükogo.
Tan asayamong nung champions aser tanabuba jenjang angur telok na nem sen lakh 1.60 aser lakh 1 senpet den takok marok o kuli kaket agütsütsü aser 3 buba aser 4 buba jenjang angur telok nema sen 50,000 aser 30,000 senpet agütsütsü renema lir.
Ano, Individual shilem nunga Player of the Tournament asayar nem Scotty ka aser Best Custodian, Best Defender, Best Mid-fielder aser Highest Scorer jenjang angur asayar nem senpet  den takok marok o kuli kaket agütsütsü renemogo.
17 buba NSF football asayamong ya taruba October ita 22 nü tembangtsü sentong lir.