Taoba LS Speaker Balram süogo

New Delhi, February 03 (Agencies): Congress lenir tain aser taoba mapang Lok Sabha Speaker, Balram Jakhar Bodhbarnü New Delhi nung alima nungi pilaogo.

Pa arishi küm 92 liasü.

Pa asüba osang angashia Ato kilonser Narendra Modi-i, Balram ya aikati sapuba lenir ka liasü aser pai asen Parliamentary democracy tali yangerdaktsü. Pa alima nungi pilaba ajanga jashir. Tesünep nung anisüngzükang, ta ashi.

Jakhar ya 1980 küm nungi 1989 tashi Lok Sabha Speaker inyaka liasü. Pa Speaker inyakba mapang Parliament Museum yanglu. Taoba mapang Naashimha Rao Ato kilonser inyakba mapang pa Union Agriculture Minister inyaka liasü.

Jakhar-i Madhya Pradesh Angh mapa June 30, 2004 nungi May 30, 2009 tashi inyakogo.

Congress Tir Sonia Gandhi-ia par kinüngertem den asüko osang lemsatepogo.

Sonia-i, “Pa lokti mapa nung alidang pai inyaktetba mapatem aser talisa aluyimertem atema inyaktsübaji Congress Party aser linüki kodanga mamatsü,” ta ashi.

“MLA ka ama, Parliament züngsem ka ama, Minister, Speaker mesüra Angh ka ama Dr Jakhar-i teti aluyimba aser aluyimertem tebilemtsü atema walunir süa inyak, aser pa leniba nung Parliament Secretariat-a yangertet,” ta laisa ashi.

Jakhar-i Punjab nung 1973-77 küm tashi Cooperation, Irrigation & Power Deput minister inyak. 1977 aser 1979 küm na assembly nung Opposition Lenir inyaka liasü.

Jakhar ya 1980 küm nungi tenzüka Lok Sabha nung pezüben tashi MP inyakogo.

1980 küm pa Lok Sabha Speaker shim aser 1989 tashi anabenren inyak.

Pa Standing Committee of the Conference of Presiding Officers of Legislative Bodies tongti, Business Advisory Committee tongti, Rules Committee tongti aser General Purposes Committee tongtia inyaka aruogo.

1990 küm pa All India Congress Committee General Secretary inyak aser 1992 küm nungibo pa Congress Working Committee züngsem liasü.