1899 küm asola, alima nung ajak dang tantsütila süogo

New York  May 13 (Agencies) : Alima nung aküm lir rongnung tantsütila, alartem semchir rongnung ka, Susannah Mushatt Jones arishi küm 116 nung süogo aser 19 century mapa America nung asor la dang sürbo joko shinga mali, ta Hokolbarnü osang kar ajanga metetdaktsü.
La ya July 6, 1899 nü aso aser la küm 30 shi aliba Brooklyn nursing home nung Brihostibarnü asü.
Susannah Mushatt Jones ya shitakbabo Montgomery, Alabama nungi lir aser English oshi nung “automobile” along mezüng adoka amshitsü tenzükba kasa küm nung aso. La sor alima nung rara tulutiba ana ajangshiogo aser US nung Tir 20 tashi melentepa yimsü süogo, ta RT online osang ajanga metetdaktsü
Jones-i yi majem, sali-moko machi aser lungsolongbena amongba tesemi kodanga mao, ta lar kinunger kati NBC osangbenertem dang ashi. Lai lanuwa nungi süngjanglijang aser süngolemba ongzükben aser agizükben achiba ajanga la temang nung teyari agüja arishi talang liasü, ta kasa kinunger jagisa ashi.
Lar adianu 11 liasü aser la 1922 küm school graduate asü. Iba sülen tetsü aser tebu nunger alar asüba mapang ayimba alu nung lar kinungertem den külemi alu inyaktsü tenzük.
La tettsü ya arishi küm 117 tashi lir asü, ta US census nung lir.
Susannah Mushatt Jones ya Tuskegee nung aliba university ka nung azüngtsü maongka angu ajisüaka lar tsüraburtemi sen agi la yaritsü makokba agi la New Jersey-i ao aser yang nung jagi New York nung oa tangar kidang kilia aser tanur reprangtsür mapa inyak.
La khen kibong aküm ajisüaka tanur maso. Anungji 1965 küm lai mapa ajak nungi anisüngzüker tanaben Alabama-i meyipa aru.
Iba sülen la arishi küm 80 asüba mapang Brooklyn nung aliba tantsür tamburtem aliba kidang alitsü tenzük aser yangjia la sasa la chiyungtsü sorochiokasa chiyung.
Yaküm April ita alima nung tantsütila, Misao Okawa, arishi küm 117 nung Tokyo nung asüba sülen Susannah alima nung tantsütila aküm.
Tang nungi joko Italy tsür arishi küm 116 tain, Emma Morano, alima nung tantsütila ta züngshitsü. La ya November 28, 1899 nü aso aser alima nung 19 century mapang asor rongnung joko la kija anünga lir.