18buba Asian Games : Neeraj Chopra-i gold medal koktetogo

Jakarta, Luroi/Aug 27 : GBK Main Stadium Jakarta nung tebur Javelin Throw, Final akokba sülen Neeraj Chopra, coach Uwe Hohn aser teammate tem den tangokba noksa nung angur.

Jakarta, Palembang, Luroi/August 27 (Agencies): 18buba Asian Games anogo 9buba tashi nung India nunger asayartemi takok tajung ngua arudar aser tanü reigning Asian champion Neeraj Chopra-i tebur javelin asaya nung gold medal kokteta national record tasen ka yangluogo. Neeraj-i nü tasembenbuba atsüba mapang meter 88.06 tsüteta gold medal kokogo.
Tetsür long jump asaya nung India tsür Neena Varakil-i silver medal koktetogo. Lai meter 6.51 jokteta liasü aser iba ya tang tashi nung la asoshi tajungtiba asütsü. Iba asaya Vietnam tsür Bui Thi Thu Thao (6.55m)-i akok.
Maneni tetsür 3000 metres steeplechase nung India tsür Sudha Singh-i silver medal ngutetogo. Lai minute 9:40.03 nung alizüng tongteta Bahrain tsür Winfred Yavi (9:36.52 minutes) sülen tanabuba jenjang nung tembang.
Kasa mapang nung India nunger asemteper Dharun Ayyasamy-i tebur 400 metres hurdles nung silver medal koktetogo. Dharun-i alizüng 48.96 second nung atong, koba pa asoshi tajungtiba lir aser pa Qatar nunger Abderrahman Samba sülen tanabuba jenjang nung liasü.
Iba asayamung anogo tekububa nung India nunger atema Saina-i bronze medal ka ngua tenzük aser la India tsürtem rongnungi 1982 küm Syed Modi-i bronze medal ka anguba sülen iba asayamung badminton asaya nung medal angur mezüngbula kümogo. Tetsür kija semifinal asaya nung lai Chinese Taipei tsür world No.1 Tai Tzu Ying makokba sülen bronze medal dang koktet. Tai Tzu-i 17-21, 14-21 agi Saina madak takok angu.
Maneni kasa asayamung tetsür kija badminton asaya nung PV Sindhu final-i iogo. Lai semifinal asaya nung Japan tsür Akane Yamaguchi 21-17, 15-21, 21-10 agi koka final tongtetogo. Sindhu ya India nunger asayartem rongnungi Asian Games badminton asaya nung final tongteter mezüngbuba kümogo.
Sindhu-i tawa World Championships nunga Yamaguchi kokogo.
PV Sindhu aser Tai Tzu Ying na tsüngda gold medal asaya Sangtennü asayatsü.