18buba NSF Martyrs’ Memorial Trophy Barak FC-i kokogo

Champions Barak FC pur trophy den NPCC tir K Therie aser tanga tongtibang nisungtem den tangokba noksa nung angur.

Kohima, October 21 (TYO): Angami Students’ Union-i “Goal for peace” omen nung ajemdakker ayongzükba 18buba NSF Martyrs’ Memorial Trophy Barak Football Club Peren-i kokogo.
Final asaya nung Nagaland Police (DGP Red Team) aser Barak FC na kanga toktepa asayar Barak puri 2-1 agi kokogo. Nagaland Police puri iba asayamung 2007, 2008, 2010, 2013 aser 2016 nung ta ponguben koka lir.
Tanü takok ya dena Barak puri iba asayamung asemben kokogo. Parnoki 2014 aser 15 nung iba asayamung koka lir.
Tanü tsüngsang majungba ajanga asayartemi pei tajungtiba agi masayatet. Taoba mapang nung oba asayamung koker aliba telok ana final asaya reprangtsüba atema nüburtem aika sentepa liasü.
Barak FC puri asaya mezüngbuba shilem nung goal anaprongla idaktsü. Mezüngbuba goal Khweteli-i minute 21buba nung idaktsü aser iba sülen Kivi Jimo Sumi-i tanabuba goal asaya mezüngbuba shilem madem tsüngda idaktsü.
Ajisüaka asaya tanabuba shilem nung sepaitemi asendenshir asaya tenzük aser parnoki goal idaktsütsü asoshi maongka tajung aika yanglutet liasü, aser iba sülen minute 74 buba nung par telok nungi asayar Ninja Golmei-i goal ka idaktsü. Parnoki tanabuba goal idaktsütsü asoshi kanga meranga asaya saka Barak FC pur defence adena lua goal magütsüteti asaya tembang.
Iba asayamung akokba atema Barak FC puri trophy den senpet sen lakh 1.6 aser certificate agizük aser tanabuba jenjang nung takok anguba telok Nagaland Police (DGP Red Team) purnem senpet sen lakh 1 den certificate agütsü.
Asayamung tatembangbuba sentong nung Nagaland Pradesh Congress Committee (NPCC) President K Therie tetushi tesemdanger asü, aser pa den NPCC general secretary Medokul Sophie nungeri sempettem lemtsü.
Asayartem ajungshia Therie-i ashiba agi, asaya ya ki kidong aser jenjang mebendangi nisung ajaki meimer.
“Iba ajanga asenok shisatsü lungjemdaktsür” ta paisa ashiba den asaya nung takok tamakok ya pei asayaba ajanga adoker aser iba nung ochi mashi kecha mali.
Asaya balala aser music ya maongka tajung, ta shia Therie-i ashiba agi, “Yimjung nung aliba linüktem nung sports club business ya ka renloka ogo aser iba ajanga mapa aika agütsür aser billionaires akümtsüba atema lenmang tatsütiba lir.’
Taoba AYO tir Khrielievi Chüsi lenisüba kübok iba sentong aka aser ASU general secretary Vizokho Zashümo-i tepela o jembi.

Senpet aser certificate dena Jurila sempet angurtem yamai alitsü:
Best keeper
Nganga Zeliang of Barak FC
Best defender
Salu Kulimbe of Barak FC
Best midfield
Pirei Shokwungnao of Tankhul Student’s Union
Highest Scorer
Kezhose Mathew of Forerunners 4th NAP Thizama, goal 14
Player of the Tournament
Kekhrieletuo Tsira, Nagaland Police
Fair Play Award – KVNS