18buba NSF Martyrs’ Memorial Trophy: Nagaland Police final-i iogo

Kohima, October 18 (TYO): Angami Students’ Union-i ayongzüka tang Kohima local ground nung 18buba NSF Martyrs Memorial Trophy tasayadak lir aser tanü semifinal asaya nung defending champions’ Nagaland Police (DGP Red Team)-i koka final tongtetogo.
Semi-final mezüngbuba Manipur nungi Tangkhul Students’ Union (TKS) aser Nagaland Police (DGP Red Team) na kanga toktepa asayaogo. Police temi minute 51 shi nisung 10 agi dang asayaaka parnoki kanga junga asayatetogo.
Parnoki iba asaya goal ka agi akok.
Asaya mezüngbuba shilem nung telok anapronglai goal idaktsütsü asoshi kanga meranga asaya aser yamaji Tangkhul SU pur-i minute 26buba nung ball kanga junga benshia lur Rinchanso Khongreiwo ajanga goal nung ball kanga junga metsüoktsü saka goalkeeper Sentimereni ball kanga junga nokdang. Iba sülen telok anapronglai goal idaktsütsüsa maongka monguteti asaya mezüngbuba shilem tembang.
Tangkhul SU nungi asayar Peimi nem minute 39buba nung yellow card ka agütsü. Police team pur atema tia maka asaya nung minute 39 orr midfielder Sakuba nem asayar yimya shidak mebenshiba atema red card ka agütsü aser iba sülen telok anapronglai goal kata magütsüteti asaya mezüngbuba shilem tembang.
Mapang tatsüka anisüngzükba sülen asaya tenzüka asayaba nung Jonah Langkham-i minute 67buba nung danger zone nung foul ka menaba sülen pa nem yellow card ka agütsüba den külemi penalty ka agütsü, koba Kekhrieletuo Tsira-i aibelen mesüi idaktsü, aser iba goal ka ajanga parnoki asaya akok.
October 18 nü SF tanabuba asaya yamai alitsü:
Forerunners 4th NAP Thizama vs Barak FC Peren @ 1:30 PM