18buba NSF Martyrs’ Memorial Trophy tasembuba jenjang Forerunners’-i ngutet

Kohima, October 20 (TYO): Angami Students’ Union-i ayongzüka Kohima Local Ground nung tang tasayadak aliba 18buba NSF Martyrs’ Memorial Trophy, football asayamung nung taoba küm Runners-up jenjang nguteter Forerunners’ 4th NAP Thizama-i tanü tasembuba jenjang ngutetogo.
Iba asaya nung Forerunners’ teloki taoba küm champion, Tangkhul Students’ Union (TKS) madak goal 6-5 agi akok.
Asaya mapang minute 90 asayaba nung telok anaprongi goal 4-4 agütsütetba ajanga ‘silver goal rule’ nung asayadaktsü.
Forerunners’ telok nungi Kezhose Mathew-i taküm iba asayamung nung goal 10 agüja lir aser tanü asaya nunga pai goal pezü agütsüteta iba asayamung nung goal timtiba agütsüteter aküm. Pai tanü asaya nung goal pezü ya asaya tenzüker minute 3, 24, 92 aser 104buba nung agütsütet.
Tia makatsüka TKS telok nungi Peimi Kasar-i ‘own goal’ ka Forerunners’ atema minute 6buba nung agütsü aser minute 59buba nung Soiham-ia goal ka agütsütet.
TKS telok nungi Franky Hungshi-i asaya tenzüker minute 14, 45 aser 51buba nung goal kaka agütsüteta hat-trick agitet aser minute 88buba nung Thotthan Mung-i penalty ka kanga junga metsüa goal yoktet. TKS nungi Ningam Vanyuinbou-i minute 99buba nung goal ka agütsütet.
Asaya tenzüker minute 87buba nung Forerunners’ telok nungi Kezhose-i asayar indang tim yimya mamshiba ajanga yellow card ka agütsü.
Honibarnü iba asayamung final ya nikongdang 1:00 ako nungi tenzüka defending champion Nagaland Police (DGP Red Team) aser taoba mapang champion, Barak FC Peren tsüngta asayatsü. Iba asaya ya nung Nagaland Pradesh Congress Committee tir K Therie tongti tesemdanger asütsü.