18buba NSF Martyrs’ Memorial Trophy tenzükogo

Kohima, September 26 (TYO): Angami Students’ Union (ASU)-i “Goal for Peace” omen nung ajemdaker 18buba NSF Martyrs’ Memorial Trophy ayongba, tanü Minister for PWD (Roads & Bridges) Dr Niekiesalie Nicky Kire-i Kohima Local ground nung sentong ka agia lapoktsüogo.
Iba asayamung nung Manipur aser Nagaland nungi telok ajak senteper 51-i shilem agitsü.
Asayaba teloktem nungi 39 Kohima nungi, Dimapur nungi pezü, Phek nungi ana aser Kiphire o Peren nungi kaka ta alitsü, aser kasa mapang nung Manipur nungia telok pezüi shilem agitsü.
Asayamung takoker nem trophy aser certificate den sen lakh 1.6, tanabuba jenjang nung nung tembanger nem lakh 1, tasembuba jenjang nem sen 50,000 aser pezübuba jenjang nung tembanger nem sen 20,000 agütsütsü. Iba dak alaka ano best goal keeper, best defender, best mid-fielder aser player of the tournament nem kicha senpet agütsütsü.
Asayamung lapokba sentong nung Minister Dr Nicky-i asayartem dang parnoki akoktsü ta bilemba mapa nung temolung agütsütsü asoshi ajungshi. “Jack of all trade and master of none asütsü temerang,” ta pai ashi. Professional asayar ka akümtsü atema coaching aser practice nung mapang indoktsüla aser iba den külemi yimya yimpong azüoka bendanga agüja asayatsüla, ta paisa ashi.
Pai maneni asayar temi football asayaba yimya tajungtiba sayua nüburtem jangratemdaktsütsü asoshi imlaba lemsatep. Minister-i maneni asaya reprangi arurtem dang merekmeju yimya benshitsü asoshi ajungshi.
Iba sentong nung NPF tir Kesosul Christopher Ltu-ia solidarity message agütsü.
Asayamung lapokba sentong ya taoba ASU tir Medo Yhokha lenisüba kübok aka aser sentong tenzüka KABA Associate Pastor, Toatoshi Longkumer-i sarasadem. Organising committee convener Kezhazer Angami-i okiala aser ASU tir Visako Rino-i lokti pela agizüka liasü.
Sentong nung Mhasi Bubu Neikha, Tutu Terhüja aser Kohima Sumi Students’ Union-i ken aden. Kasa mapang nung ASU games & sports secretary Megu Ratsa-i kulizüngteba sentong achaayanga agi.
Asayamung tenzükba mezüng asaya nung defending champions Nagaland Police DBP Team Red-i 5-0 agi New reserve Youth Organisation tsükdaktsü.
Asaya tenzüker minute 5buba nung sepaitem rongnungi Kekhrieletuo-i mezüngbuba goal agütsü aser iba sülen Limabai minute 6buba aser 23buba nung ta goal ana agüja asaya mezüngbuba shilem 3-0 nung tembang. Asaya tanabuba shilem tenzükli Sakutemjeni goal pezübuba agütsü aser iba sülen Lipokbai minute 62buba nung goal pongububa agüja parnoki iba asaya ayong ayonga akok.
New Reserve Youth Organisation asayar Amugha aser Hoinato na aser Naga Police nungi asayar Lipokba, ta asayar yimya tim mebenshiba atema merenshia liasü.