1945 küm Netaji tayimtsü lendong nungi kümzük südi

Hyderabad, March 31 (Agencies): Mongolbarnü Narendra Modi’er sorkari Netaji  Subhas Chandra Bose dak sentakba file kar sayaa liasü, aser item file ajanga- pa süogo ta bilemba anogo sülen pai (broadcast) radio ajanga osang asem agüja liasü, ta kuli sayuogo.
1945 küm August 18 nü Tawain nung Netaji tayimtsü tsükokba lendong nung asü ta amanger, ajisüaka pai broadcast asem agütsüba anogotemji iba tatalokba anogo sülen ang lir.
File No 870/11/p/16/92/Pol nung item broadcasts lir, aser ibaji Netaji nungi asütsü südi.
Iba osangji Bengal nung Governor House nungi aru. Iba file nungji shia aliba agi, monitoring service kati 31-metre band nung broadcasts agizüka liasü. Iba sülen iba osangji  Angh, R G Casey nem metetdaktsü.
Netaji nungi asütsü südi ta bilemba mezüngbuba broadcast ji 1945 küm December 26 nü liasü.
Iba Broadcast nung, “Tang ni alima tashi abenertem kübok jenoka lir, India atema küm melungjang aronger. Third World War teyalong nung ni India-i aotsü. Iba raraji küm 10 nung mesüra ibaji matongdang ataloktsü akok. Iba sülen Red Fort nung ozü nisungtem anema inyaktsü merangertem madak ni obendang agütsütsü,” ta shia lir.
Tanabuba broadcast ji 1946 küm January 1 nü liasü aser iba broadcast nung, “Küm ana tsüngda asenoki nüjiso angutsüla. British imperialism ajanga iba ya raksatsü aser ibaji ajanga India nem nüjiso agütsütsü melungtsüla. Meraraba lenmang (non-violence) ajanga India nüjiso mangutsü. Ajisüaka ni Mahatma Gandhi akhümtsübur,” ta shia lir.
Tasembuba broadcast ji 1946 February nung liasü aser iba broadcast nung, “Iba ya Subhas Chandra Bose-i jembir, Jai Hind. Japan-i surrender asüba sülen tang agi tasembenbuba ni ozü India adianutem aser aianutsürtem den jembir,” ta shia lir.
Mongolbar nü sangdongba file nungjisa 1946 July 22 nü, British nungeri India yimsüsüba mapang tatembangbuba Vicerory, Louis Mountbatten atema Gandhi secretary tem rongnung Khurshed Naoroji-i züluba shidi lir.
Naoroji-i Mountbatten dangi züluba shidi nungji, “Temelungjang nungbo, Indian Army-i INA (Bose’s Indian National Army) atema bilemtsür. Bose-i Russia teyari agia India-i arura Gandhi mesüra Nehru mesüra Congress-i linük den shisa melemsateptettsü,” ta zülua lir.
Iba file nungsa, Bose lendong nung asüba osang sangdongba sülen iba mapang nung Southeast Asia nung teloktep sepaitem tongti commander, Mountbatten dangi Military Intelligence indang British directorate nungi osang ka aru.
Iba osang nungji, “Tayimtsü ajanga Burma toktsür aotsü Bose renemdang, Japan nungeri pa dang Burma nung dang alitsü yokba osangji China nungeri agizük, iba sülen Bose Thailand-i jena ao,” ta lir.