1976 Nagaland Revival küm 40 jungogo

Dimapur, May 9 (TYO): May 8, 1976 nü Anaki nung Tsüngremi Revival milak tulu meküploktsür küm 40 ajungba anogomong 8 May, 2016 nung temoatsü tulu ngua mongogo.
Iba sentong nung ‘The Fire of Revival’ Lenir, Rev. M.I. Luen aser Pastor Toshi, Tuli Lenden Arogo nati Tsüngrem o tulu agi nübortem moatsü.
Iba sentong ya T.Ken 100:4 nung ajemdaker Tsüngrem nem tenüngsang agütsüba mapang liasü aser tarur ajak temoatsü tulu anguba den tanaben Tsüngrem nem bendanga agütsüshi.
Anaki yimi aser asür Chubanukshi’er jabasotemi Revival arur küm 40 abensaba tenüng nung ‘The Fire of Revival’ kimong asütsü asoshi ali ka tenla agütsü aser iba kimung meshitetba sentong Tuli Lenden Arogo, Pastor, Toshi menden ser agi aser Rev. M.I. Luen-i nüngshilong azüng.
Sentong nungsa Asangla-i, Anaki ya ‘Revival model village’ ka yanglutsü atema tarurtem ayongzük.
May 7 nü Anaki Arogo Pastor aser Council Chairman-i anir Anaki nungertem ajak Revival arur küm 40 ajungba tenüng nung yimdong süa süngdong atem.
Anaki, Tsüngrem milak tulu alua Revival tenzükba yim, alima ajak nungi aruagi tanela temoatsü agizükba tesem ka asütsü asenoki sarasademdi, ta ‘The Fire of Revival’ (Dimapur) Co-ordinator, Asangla (Luen) ajanga sangdong ka nung metetdaktsü.
Revival arur küm 40 abensaba anogomong tanen makai Tsüngrem nem tenüngsang agütsüba sentongtem amongtsü. July 24 nü Changtongya Town Ao Baptist Arogo nung aser October 9 nü Tuli Lenden Ao Baptist Arogo nung amongtsü.