1984 küm aibelenertem merenshi asübo mepetmesü melila: Delhi CM Kejriwal

New Delhi, November 01 (Agencies): Tanü Delhi Chief Minister Arvind Kejriwal-i, 1984 küm Sikh nunger anema raraba nung aibelenertem nem temerenshi agütsü asübo Gujarat aser Dadri nung rara aser mepetmesü matalokla, ta ashi.
Taoba mapang Ato kilonser Indira Gandhi tepsetba nungi India nung Sikh nunger anema rara tulu adokba sülen küm 31 ajungba anogomung nung Chief Minister, Kejriwal aser Deputy chief minister, Manish Sisodia nati Sigh rara nung asür kibong 1,300 shia nem sen lakh 5 cheque lema agütsüogo.
West Delhi, Tilak Vihar nung cheque lemtsüba sülen Kejriwal-i, “1984 rara nung aibelenertem nem tesüiba küm 31 tsüngda temerenshi agütsü asü nungbo Gujarat aser Dadri nung tatalokbatem ya malitsü asü. Tamangba yimsü nung ajemdaker tesempa proktsü ajaki tsübutsü aser linük nung tesempa meproki lila,” ta ashi.
“Sorkar tashi nung alirtemi parnok (aibelenertem) kümzüktsü ta meteta alibayong parnoki tesempa proker,” ta paisa shisem.
Sikh rara nung asür kibongtem nem sen crore 130 shi lema agütsüogo ta Delhi sorkari asadangtetogo. Iba senji tesülen Centre sorkari Delhi sorkar nem meyipa agütsütsü.