1987 INF Nuclear Deal nungi Russia atsünginogo

Moscow, Tsüklai/February 2 (Agencies): Russia-i, Cold War mapang Intermediate-range Nuclear Forces Treaty yangluba nungi atsünginogo, ta Tir Vladimir Putin-i Honibarnü metetdaktsüba den sorkar dang Washington den disarmament ken o keja mejimbtsü tetuyuba agütsüogo. United States-i iba amala mesükba jenjang ka agiba sülen parnoki tang iba jenjang ya agiogo.
Moscow aser West na ken o aika dak ajemdaker tesendaktep mejungi arudar. Ken o tem rongnung Russia-i Ukraine ket nungi Crimea agiba, aser US tir election nung teka jushi ta aitsüba aser Britain nung nerve agent kati amakba tem densema lir.
Tang INF treaty dak sendakba nung Russia-i telemtetba agiba ajanga United States aser West den tesendaktep tamajungba kümshiogo.
“American partner temi iba tenangzüktepba nung shilem magitsü lemtetba sangdongogo anungji onoka iba tenangzüktepba nung shilem magitsü,” ta Putin-i foreign & defence minister tem den senden ka nung ashi.
1987 arms control pact nung aibelenba ita trok tsüngda Moscow-i metembangdaktsüra United States-i Russia den INF treaty yanglua aliba nung parnok shilem magitsü ta Hokolbarnü sangdongogo.
Putin-i, Russia-i missiles tasen yanglu tenzüktsü aser iba nung hypersonic missiles tem densema lir ta ashiba den US-i iba amala jenjang agiba nung telangzüba agütsü monur ta aija minister tem dang Washington den disarmament dak sendakba nung sensaksem kecha magitsü tetuyuba agütsüogo.
“Onoki aiben disarmament dak sendakba nung sensaksemtsü asoshi merangdangogo saka onok partner temi iba ya pu masemer,” ta Putin-i ashi.
Kasa senden nungsa Russian foreign minister Sergei Lavrov-i, US-i INF aser tanga arms deal tem nung aibelenba aitsüogo.