19buba NSF Martyrs’ Memorial Trophy 2018 tenzükogo; Rising Start Mizoram-i Asufü CI Senapati akok

Minister Tongpang Ozukum aser MLAs Dr Neikiesalie Nicky Kire & Zale Neikha den ASU, organizing officials aser Rising Star Mizorm o Asüfü Christian Institute, Senapati nungi asayartem tangokba noksa nung angur.

Kohima, Rongjui/September 22 (TYO): “Goal for Peace” omen nung ajemdaker Angami Students’ Union (ASU)-i ayongba 19buba NSF Martyrs’ Memorial Trophy tanü Kohima Local Ground (Khuochiezie) nung tenzükogo.
Asayamung mezüngbuba asaya Rising Star Mizoram-i 2-1 agi Asufü Christian Institute, Senapati madak takok nguogo.
Asaya nung mezüngbuba goal ya penalty ka ajanga Rising Star Mizoram puri idaktsü. Asüfü Christian Institute Senapati nungi asayar kati box telung nung handball ka menaba sülen referee-i penalty metsütsü asoshi maongka agütsü koba Arraham-i aibelen mesüi idaktsü.
Asüfü puri minute 18buba nung iba goal küptoktsü asoshi maongka angu saka Sibo Athili-i ball pass asüba Lavoriyi Thelou o Athihrü napronglai goal nung magütsütet.
Iba sülen minute 24buba nung Rising Star forward Isak aser goal keeper na kija liasü saka Kaihrü-i, Isak-i metsüba ball nokdang. Rising Star puri asaya mezüngbuba shilem amokbanger asaya.
Ajisüaka asaya tanabuba shilem nung Asüfü puri kanga tashi ita asaya tenzük aser minute 6 tsüngda parnoki goal idaktsütsü maongka angu saka Leangao-i metsüba ball Rojit Sing-i nokdang. Iba sülen minute 52buba nung Manio-i Asüfü pur atema goal ka idakja goal kasasa aküm.
Asaya nung telok anaprongla kanga toktepa asayaa arur minute 58buba nung Fiat Khongsai-i Rising Star pur atema tanabuba goal idakja parnoki asaya akok.
Asayamung tenzükba sentong nung tetushi tesemdanger ama o jembidang PWD minister Tongpang Ozukum-i 19buba NSF Martyrs’ Memorial Trophy takok ngua ayongba atema Angami Students’ Union tenüng asang.
“Iba asayamung ya tatalokba ka ajanga aser nükjidong ka yur ayonger . Iba asayamung ya maneni asayaa ao tashi nungbo asürtem bilemtettsü anungji ASU-i tanga maparen aika liaka iba asayamung mesamadaktsüi maneni ayongtsü mepeshir,” ta pai ashi.
“NSF Martyrs’ Memorial Trophy ya lanurtem ajungkettsü asoshi lir aser iba ajanga Nagaland nung aliba nüburtem aser state alema orr alitem tali longjemdaktsür aser asür dang asenoki parnok bilemtetba sayur. Maneni iba asayamung ajanga tai maketba kaketshirtem aser nüburtem dak mapa tamajung inyaktsü sayur aser iba ya lokti nung yimjung bener aruba asayamung ka lir,” ta Minister-i ashi.
Asayamung tenzükba sentong ya ASU tir Visako Rino lenisüba kübok aka aser Central Baptist Church Kohima pastor Neisakuolie Mere Kesiyie-i sarasadema tenzük. Iba sülen lokti pelaa agizükba o Organising committee Convenor Voto Neikha-i jembi aser NSF tir Kesosül Christopher Ltu-i solidarity message agütsü. UBC Teens Choir aser Vocal teacher, Music Academy aser Vocalist of Fireflood, Gospel Rock Band, Kekhrie Ringa nungeri ken tajung tena lokti ajungmeso. Nagaland nungi All Girls Pipe Band, Adolescent Girls Club, Nagaland State Social Welfare Board nungeria sentong nung shilem agi.
Rongjui/September 24 nü asaya yamai alitsü:
1. Thürütsüswümi SU Phek vs Friends United New Market @ 12 Noon
2. Kohima Science College vs Lower Jail YO @ 2PM