19buba NSF MMT 2018: Centurion FC aser Meriema VYO tanü final asayatsü

Kohima, Mongputeni/October 19 (TYO): NSF MMT 19buba Edition asayamung final ya tanü Mongputeni/October 20 nikongdang 1:30 ako nungi tenzüka asayatsü. Iba asaya nung alaktetta tejaokerji Advisor for Youth Resources & Sports, Zale Neikha asütsü.
“Goal For Peace” omen nung ajemdaker Angami Students’ Union-i ayongzükba asayamung nung Centurion FC Kohima Village aser Meriema Village Youth Organisation na tsüngda mezüng final asayatsü.
Ita ka piyong asaya aruba asayamung ya Rongjui/September 22, 2018 nü nungi tenzüka liasü. Iba asayamung lapokba sentong nung PWD Minister, Tongpang Ozukum tetushi tesemdanger ama auragi dena liasü.
Rogonü/Friday ASU Seniors XI aser Kohima BAR Association na tsüngda edition tasembuba Running Trophy Exhibition Match asaya liasü. Iba asaya nung Advocate Khriedi Theünuo, president Kohima BAR Association tetushi tesemdanger ama jaok. Kohima BAR Association-i ASU Seniors XI madak goal 5-3 agi koka takok marok agizük.
BAR Association nungi asayar Blisto-i goal asem idaktsüba ajanga pai Golden Boot Award agizük. Kasa telok nungi asayar Aliba aser Keduovi nati goal ka-ka idaktsü.
ASU Seniors XI nungi asayar Sikho-i goal ana aser tasembuba goal ji Ketholetuo-i idakja liasü.
Kohima BAR Association nungi asayar Keviselhou-i Golden Glove award agizük aser ASU Seniors XI nungi asayar Sedeneikho Suosahie nem Man of the Match sempet agütsü.