19th NSF Martyrs’ Memorial Trophy : Monsang SU aser Kohima Eagles quarter final-i iogo

Kohima, Mongputeni/October 10 (TYO): 19buba NSF asayamung nung Monsang Students Union aser Kohima Eagles na quarter tongteba mezüngbuba team ana kümogo. Iba asayamung ya Angami Students Union-i ayonga Kohima Local Ground nung asayadaki.
Mezüngbuba pre-quarter final round asaya nung Monsang Students’ Union FC Manipur-i goal 5-4 agi tie-break ajanga Rising Star madak takok nguogo. Telok anapronglai minute 80 asayaba nung goal ka danga magütsütetba sülen penalty metsütep.
Telok anapronglai kangajunga asaya saka Rising Star puri ball timba amshia liasü aser Isaac aser Rinawaa nati goal idaktsütsü asoshi maongka asemben tashi nguteta liasü saka Monsang SU goal keeper Zingthang-i ball kangajunga nokdang.
Asaya tanabuba shilem nung Monsang SU forward Marconi-i tekolak agi goal idaktsütsü asoshi maongka angu saka pai goal nung tongoktsütsü melena ball azüoktsü merangba ajanga goal magütsütet. Iba sülen Rising Star puri goal idaktsütsü maongka pezübuba ngutet saka Isaac-i metsüba ball tezüleni oadok.
Tie-breaker asayaba mapang Rising Star nungi asayar Romeo-i goal midaktsütetba ajanga parnoki asaya makok.
Monsang Students’ Union nungi asayar Alower aser Ngamneirü aser Rising Star nungi asayar Lun nunger nem asaya nung yellow card kaka agüja liasü.
Tanü asaya tanabuba nung Tribal Brothers puri goal 3-1 agi Tiema-Khe Kidima madak takok nguogo.
Asaya nung mezüngbuba goal Tiema-Khe Kidima nungi asayar Kevisekho Thokwhe-i minute 6buba nung idaktsü aser minute 61buba nung Laiwang-i Tribal Brothers pur atema goal magütsü tashi parnok tejakdang sür asaya. Iba sülen minute asem lir Laiwang-isa par telok asoshi tanabuba goal idaktsü aser Shurhosül-i minute 69buba nung Tribal Brothers pur atema goal tasembuba idakja parnoki asaya akok.
Asaya nung Tribal Brothers nungi asayar Eshong aser Tiema-Khe Kidima nungi asayar Viketozo Thokhwe na nem yellow card kaka agütsü.
Tribal Brothers aser Monsang Students’ Union FC na Mongputeni/Oct 15 nü Quarter Finals asayatsü jangjaogo.
Mongputeni/ Oct 11 nü asaya yamai alitsü:
1. Phesama YO vs Charoi Chiru Naga FC Manipur
2. Meriema V.Y.O vs United Brothers FC