1buba Gordon Graham prize for Naga literature award agütsüogo

Dimapur, Rongchii/April 10 (TYO): Mezüngbuba Gordon Graham prize for Naga literature award agütsüba sentong, Hotel Vivor nung April 9, 2019 nü agiogo. Gordon Graham prize for Naga Literature ya züluba yimya, Naga nunger kaket zülurtem ajungkettsü aser Naga nungertem zülutsü aser azüngtsü jangradaktsütsü nükjidong nung 2018 küm amenok. Iba sentong ajanga Naga nunger shisatsü bendener aser agütsürtem tushir.
Sentong nung o jembidang Chief Minister, Neiphiu Rio-i, iba amala inyakyim ajanga züluba yimya ajungkettsü aser kaket zülurtem ajungketba den parnok tushitsü, ta ashi. Paisa iba naroküm agütsüba ajanga Naga nunger zülutsü aser azüngtsü ajungmesotsü aser yimdangjem ulushitsü, ta ashi.
Paisa, Naga nunger lanurtemi parnok tekelok shitsü tesademba lapoktsü atema kaket azüngba yimya benshitsüla, ta ashiba den temsüa aliba nisungtem nem iba naroküm agütsüba ajanga shisatsü tali renloktsü aser state nungi kaket zülur aika adoktsü imlaba lemsatep.
Takokertem tenüngsanga pai ashiba agi, parnok dak alia tangar temsü alir shinga mali kechiyong parnok ya lanurtem nükrandong lir.
Rio-i ashiba agi, KES-i iba award agütsüba sentong ya Kohima rara küm 75 ajungba küm Gordon Graham nüngtem nung amenok. Pa iba rara nung lanur captain ka ama British 2nd division nungi raraa liasü. Kohima Educational Society tenüngsanga Rio-i ashiba agi, iba award Gordon Graham tushitsü atema kanga tapet lir, shibai Naga nunger lanur aser lokti ajungkettsü atema kaketshisatsü agütsütsü asoshi teyari agütsüogo.
Gordon Graham’er jala Sylvia May-i ashiba agi, Gordon Graham ya taküm peyong kaket zülur ka liasü aser pa asoshi iba mapa ya kanga tongtibang liasü. Laisa, pa ya classic scholar ka liasü, shibai oshi poktetba aser amshiyim koda tongtiba iba indang angateta liasü aser ibayongji pai Naga nunger oshi aika asadang aser kin o kin tsüngda mangatettap idanga asadang, ta ashi.
Sylvia-i ashiba agi, Gordon-i o amshiba yimya ya kati ka angatettepa jembishinütsü asoshi kanga tongtibang ta amang aser oshi shidak amshiba ajanga asenok sendakteptettsü. Iba tebilemdangba ajanga pai Naga nunger oshi nung ojang tongtibangtem adoktsü.
Laisa, Kohima Educational Trust tentettsüba ya Gordon Graham-i apitet aser koba pai kanga bendanga agüja inyakogo, ta ashi. Nisung aikati la tebui pa taküm nung rara indang aiben mejembi saka Naga nunger atema teti bilema liasü ta ashir.
May-i ashiba agi, 2004 küm Kohima rara 60buba Anniversary nung pa aser par medemertemi Naga nunger lanurtem nem teyari agütsütsü atema Educational trust ya ngutet.
1buba Gordon Graham prize for Naga Literature ya Fiction category nung “When the river sleeps’ kaket atema Dr. Easterine Kire nem agütsü aser non-fiction category nung ‘Forgiveness and Politics: A Critical Appraisal’ kaket atema Kethoser Aniu Kevichusa nem award agütsü.
Gordon Graham award ya fiction aser non-fiction ta jenjang ana küma lemsar agütsür. Award atema benokba kakettem ya tubak 150 bosa asütsüla. Jenjang anaprongla atema award agütsütsü aser kuli kaket den sen lakh kaka agütsütsü.
Kakettem agütsütsü asoshi tatembangbuba anogoji June 15, 2019 asütsü aser award atema shimertem tenüng 2019 August ita adoktsütsü aser iba sülen takokertem November ita sangdongtsü. Award agütsüba sentong ya December ita Hornbill Festival mapa agitsü. Candidate temi parnok indang kaket pezü den digital soft copy ka agütsütsüla. Maneni Candidate temi 1000-2000 word abstract ka entry form den külemi agütsütsüla.