1buba Hornbill International Strongest Man & Fitness Man tetoktepba Tsuknungaküm Jamir-i kokogo

Kohima, December 5 (TYO): 1buba Hornbill International strongest man & fittest man tetoktepba heritage village Kisama nung December 5 nü kaogo. Iba tetoktepba ya ‘Exercise yourself towards Godliness (1 timothy 4:7) omen nung ajemdaker Tourism Department-i senotsü teyari agüja Zumu Gym Kohima-i presente asü.
O tatsüka jembidang Zumu Gym proprietor-i Tourism Department-i iba sentong takok asoshi teyari agütsüba atema tenüng asang. Pai ashiba agi, iba sentong ya fitness ajungkettsüba aser Naga athletes tem potential, endurance, tashi aser sempet sayutsüba atema sabang ka agütsütsü nükjidong nung aka.
Pai ashiba agi, asen lokti nung libaliro majungba aser exercise peria magiba ajanga temangnung tashidak; obesity, diabetes, high blood pressure nunger amala bendenloker. Paisa ashiba agi, asenoki jangraba shimtsüba atema fitness option aika lir, aser fitness ya langka ajangtettsüba atema masü saka taküm libaliro yimya ka lir, ta ashi.
Iba sentong leniria iba tetoktepba ayongzükba ya tashi sayutsüba aser iba den külemi asen taküm liyonga aotsüba atema temang anema alitsüba ya nüngdaker ta metetdaktsütsüba atema lir, ta shisem.
Strongest man tetoktepba nung nisung 24-i shilem agi aser fittest man tetoktepba nung nisung 5-i shilem agi. Iba tetoktepba akoktsü atema tetoktepertem-i tetendangba 9 ajangtsü nüngdaka liasü. 1buba Hornbill International strongest man & fittest man tetoktepba nung takok angurtemji: Strongest man category nung Tsuknungakum Jamir-i mezüngbuba jenjang ajangtet aser pa nem senpet sen 40,000 agütsü, kasa tetoktepba nung Vizobielie Punyu-i tanabuba jenjang ajangtet aser pa nem senpet sen 20,000 agütsü. Kasa mapang nung fittest man category nung Vizobielie Punyu-i mezüngbuba jenjang ajangtet aser pa nem senpet sen 40,000 aser tanabuba jenjang ajangtet sang Kutho Neikha-i nem senpet sen 20,000 agütsü. Kasa mapang nung, Hepuni Kajükho Mr Hornbill 2017-18 adokogo, aser pa nema senpet sen 5000 agütsü.
Iba tetoktepba nung tetendangertemji ape, victor, Ketseiu, Aungthung, Kenusevi, Mhonbemo aser Kuchuhu nunger liasü.
Iba sentong ya Kenisevi Meyase lenisüba kübok aka.Sentong tenzüka Alole Jami-i sarasadem aser Chuba Jamir-i ken ka aten All Contact Combat Arts (ACA) Academy DOJO züngsemtemi Wai Kru Muathai saya.