1buba Kohima District Inter-School Football Tournament

Rüzhükhrie Govt Hr.  Secondary School-i kokogo

Kohima, July 15 (TYO): 1buba Kohima District Inter-School Football Tournament Rüzhükhrie Government Higher Secondary School-i kokogo. Iba asayamong ya Royal Club Kohima-i ayongzüka local ground asayaa aruogo.
Tanü final asaya nung Rüzhükhrie GHSS puri G.Rio School 2-1 agi akok.
Final asaya telok ana tsüngda kanga sütepa asayar Rüzhükhrie GHSS-i koka senpet sen 70,000 den külemi certificate agizükogo.
Asaya nung mezüngbuba goal G Rio nungi asayar Sangti-i minute 19 buba nung agütsü saka mapang tatsüka dang lir par telok nungi Sanentemjeni par goal nung gola ka inoktsüba sülen score kasa aküm. Rüzhükhrie GHSS right-out Neisa-o-i ball cross agütsüba indoktsü merangdang Sanentemjen-i aibelena par goal nung ball inokja asaya mezüngbuba shilem goal 1-1 nung tembang.
Asaya tanabuba shilem asayatsü asoshi latetja aliba minute 90 tembanga telok anapronglai asayar yimya tajungtiba amshia asayaa liasü. Ajisüaka yiruipongba atema minute pezü talila apoloktsüa asayaba mapang Rüzhükhrie GHSS puri corner ka metsüa minute 92 buba nung defender Dziesenei-u-i goal idakja parnoki iba asaya akok.
Iba sülen G Rio puri kanga meranga asayadang saka parnok asoshi menoadoker liasü. Asayamong nung tanabuba jenjang tongtetba atema parnok nem senpet sen 50,000 den külemi certificate agütsü.
Mt. Sinai HSS aser Ministers’ Hill Baptist HSS naprongla semifinal tongtetba atema senpet sen 20,000 agütsü aser asayamong nung shilem agir tanüngba school 20 nem shilem agiba certificate agütsü.
Additional Chief Secretary aser Home Commissioner, Temjen Toy-i tetushi tesemdanger ka ama senpet aser tanga award tem agütsü.