1buba Kohima District Inter-School Football Tournament osang

Kohima, July 13 (Agencies): Royal Club Kohima-i ayongzüka akaba 1buba Kohima District Inter-School Football Tournament tanü asaya nung Rüzhükhrie Government Higher Secondary School puri koka final tongtetogo.
Rüzhükhrie GHSS aser G.Rio School na July 15 nü nikongtsütsü 2:00ako nung final asayatsü.
Tanü semifinal tanabuba asaya nung Rüzhükhrie GHSS-i, Mt.Sinai Higher Secondary School madak gola ka agi takok angu. Asaya nung goal ka ya Vilakholie-i agütsü.
Terepranger 3000 sentepa aliba asaya nung telok anapronglai minute 90 tashi asayaba nung goal kata magütsütet.
Asaya tenzüker minute 34buba nung Rüzhükhrie GHSS puri penalty ka metsütsü asoshi maongka angu saka ball crossbar adena metsüdok. Maneni asaya tanabuba shilem nung parnoki ano penalty ka metsütsü asoshi maongka angu saka ajia meyoktet. Iba sülen telok anapronglai defence adena ball bener meluteti kanga sütepa asaya.
Minute 90 asayatsü lateta aliba tembangba sülen talila minute 15 asayasemba nung Vilakholie-i minute 102 buba nung tekolak agi goal ka kanga junga tongokja Rüzhükhrie GHSS pur nem takok agütsü.
Asaya nung Mt. Sinai HSS nungi asayar Shoungoalou Pohena aser Vechie Ciirha na nem yellow card kaka agütsü aser ano Rüzhükhrie GHSS nungi asayar Vilakholie-i asayar yimya tim mebenshiba atema pa merenshia liasü.
Semi-final tongtetba atema Mt. Sinai HSS nem senpet sen 20,000 agütsütsü.
State Information Commissioner Kevizatuo Miachieo aser Royal Club Kohima tir na iba asaya nung tetushi tesemdange liasü.
July 14 nü asaya:
Royal Club Kohima vs Kohima Press Club
@2:00 PM