1buba NAM TT asayamung Kohima nung tanü nungi tenzükogo

Kohima, Rongchii 25 (TYO): Mezüngbuba Nizheto Awomi Memorial (NAM) Table Tennis championship Rogonü TT Indoor Stadium, Raj Bhavan, Kohima nung tenzükogo.
Anogo asem tashi asayatsüba asayamung koba Rongchii (April) 27 nü tembangtsüba lir, ia ya Quasar Club aser Kohima District Table Tennis Association (KDTTA) na sentepa ayongzükba lir. Iba asayamung nung tetsür trok dena asayar ajak agi parnok 48-i shilem agidar. Asayar 25 men’s category nung shilem agitsü aser asayar 17 youth boys championship nung shilem agitsü.
Asayamung tenzükba sentong nung tetushi tesemdanger ka ama o jembidang Additional Director of Youth Resources & Sports, Rato Pusa-i, indoor games, talisa badminton aser table tennis ajungkettsü nüngdakba lemsatep, kechiyong iba saya ya Naga nunger asoajen den tapet lir. Paisa Olympic Games nung table tennis aser badminton asaya nung mongoloid temi medal timbaka koktetba ateshia jembi.
Chief Minister Neiphiu Rio-i state nung saisapong ajungkettsü merangba lemsatepa Pusa-i asayartem dang jenjang temaba nung takok tajung angutsü asoshi meranga inyaktsü ajungshi.
Kasa mapang nung pai asayamung ayongertem dang iba amala mesükba asayamung ya district nung kinük nung aliba tesemtem aser saisapong tsütsü terenlok maliba district tem nung ayongzüka akatsü asoshi ajungshi. Piasa Kohima, Dimapur aser Mokokchung dak alaka saisapong tsütsü tanga district tem ano kangabo tejakleni moi lir, ta ashi. Asayar tejen Lhoulievi Belho iba asayamung chief umpire asütsü.