1buba Victor North-East Masters (Veteran) badminton championship tenzükogo

Dimapur, Nagarjan nung May 4 nü Lok Sabha MP, Neiphiu Rio-i 1buba Victor North East championship lapoktsüba mapang tangokba noksa nung angur.

Dimapur, May 4 (TYO): Kuda (Nagarjan) Youth Badminton Stadium nung 1buba Victor North-East Masters (Veteran) badminton championship lapoktsüba mapang Lok Sabha MP, Neiphiu Rio-i ashiba agi, India nung cricket sülenbo nüburtemi kanga sapua asayaba asaya rongnung badminton yaa ka lir. Maneni Asian shilu pur ya iba asaya asayatsü asoshi ‘physical structure’ aser ‘reflexes’ tajung lir anungji North-East nung aliba nüburtemi iba maongka ya takok tashi amshitsüla.
Rio-isa ashiba agi, Asia linük China, Japan aser Indonesia amalatem alima ajunga nung badminton asayaba nung temaba jenjang nung lir aser India-a jenjang 9buba nung lir.
Victor Company-i iba asaya NE nung ajungketba asoshi tenüngasangba den külemi veteran asayartemi iba asaya jenjang temabai ajungkettsü asoshi lanurtem ajungmosotsü ayongzük.
MP-i maneni Nagaland nung lanurtem asaya nung anitettsü asoshi veteran temi badminton academie balala amenloktsü imlaba lemsatep. Yimten yimsüsüba, rara balala aser tamangba yimsü balala ajanga nüburtem tsüngda nung telemsa adokdaktsür, saka asaya ajanga item ajak toktsür telongjem dang adokdaktsür, ta paisa ashi.
Deputy Commissioner Dimapur, Kesonyu Yhome iba asayamong ayongba Committee nung Convenor lir aser pai iba asayamong ajanga North East nung iba asaya ajungketba dang masü saka nüburtem tsüngda nung telongjem tali adokdaktsütsü imlaba lemsatep.
Iba asayamong nung Arunachal, Assam, Manipur, Meghalaya, Mizoram aser Nagaland nungi asayartem shilem agitsü asoshi züngoksemogo. Nagaland nungi dena national umpire 5-i iba asayamong achaayangtsü. Arishi küm 35 nungi tenzüka asaya telemsa 7 tashi lemsar asayatsü.
NE state tem nungi asayar telok 92 iba asayamong nung shilem agitsü aser GHSS badminton auditorium nunga asayatem asayatsü.
Asayamong lapokba sentong nung Pastor, Khriezovi Kiso-i temoatsü meshia sarasadema tenzük aser Sinya Kath-i ken ka aten. Iba sayamong ya Victor-i sponsor asür aser Nagaland Badminton Association kübok Dimapur District Badminton Association-i achaayanga amonger.