1st Mkg Inter-Ward football asayamung Arkong Ward-i benogo

Mokokchung, March 30 (TYO): Youth Association Marepkong-i ayongzükba mezüngbuba Mokokchung Inter-Ward Football Tournament March 25 nungi tenzüka anogo pungu nü tashi Imkongmeren Sports Complex Mokokchung nung asayaa arur, March 30 nü takok ngua tembangogo. Taküm iba asayamung marok Arkong Ward-i benogo.
Final match Arkong Ward o Artang Ward na asayadang, lemzüktsüba mapang (full time) asaya tashi nung shingaia goal kada magütsüteti asaya tembang. Anungji, minute talila apuloktsür extra time asayaba mapang minute 105 nung Arkong nungi defender Jersey No. 13, Longshin-i par telok atema goal tajung ka idakja Artang madak takok tulu ngua liasü.
Takoker nem senpet trophy den kuli kaket aser sen 50,000/- aser atongdakba nem kuli kaket den sen 30,000/- senpettsüogo. Taküm iba asayamung nung Mokokchung town kübok ward 15-i shilem agia liasü.
Nija senpet/sempet agizükertemji; Best Keeper – Imliwabang (Alempang), Best Defender – Longshin (Arkong), Most Promising Player – Ashish (Mongsenbai), player of the tournament – Aripong (Arkong) aser highest scorer-ji – Temsutoshi (Arkong), Arennungsang (Lijaba Lijen), Limasungkum (Tongdentsuyong) aser Imnatoshi (Mongsenbai) par pezüi angu. Par pezüi goal pezüzü (4 goals each) agütsü.
Iba asayamungmung shibangba sentong nung 2nd NAP Alichen Commandant, H. Kuhovi Sema tetushi tesemdanger ka ama arua merakettsüba den asayartem dang tajungshi o tulu bener arua ayongzüka liasü.