2 buba Axom-Naga round table meet liogo

Kohima, May 13 (TYO): Akhidang nungi kidanger ana tsüngda tesentaktep tajung aliba yanglushitsü aser akangshitsü atema Asom Sahitya Sabha (ASS) aser Naga Hoho (NH) nati ayongzükba Axom aser Naga nunger molungtet teloktem senden tanabuba takok ngua menogo.
Guwahati nung Nanda Talukdar Foundation-i acha-ayanga Hokolbarnü Kohima nung iba senden mena liasü.
Yaküm October 9 nü Guwahati nung Axom aser Naga 1 buba Round table meet mena liasü, aser iba mapang state ana tsüngda tesentaktep akangshitsü atema bangzünga renem.
Tanü amenba senden nung tongti tesemdangerji, taoba Nagaland Minister, Tiameren Aier liasü aser pai o jembidang, küm aika Assam aser Nagaland tsüngda arrtsü mangatettep ken o mebentettetba atema tebilemtsü khuret abenba metetdaktsü.
“Iba onük atema yimten lennirtemi süoki ia mebilemer aser kati ka dak tai tongloktsütepa dang arur aser iba jagi tanü tashi arrtsü mangatettep ken o mebenteti lir,” ta Tiameren-isa ashi.
“Loktiliba nung molungtet teloktem dak temulung alemer, anungji Assam o Naga nunger tsüngda sobaliba aser shishilembaba maneni lemsatepba den mapang shia nübortem ajurutepa sensaksemba ajanga arrtsü ken o angatetteptsü. Asenok külemi melongjemra Centre aser State sorkartemi maneni iba ken o atema tatemtsü agüja iba khuret mebenteti dang aotsü,” ta tongti tesemdangerisa tesentepertem ayongzük.
“State anaprong pei pei khuret lir, saka asenok ajak India kübok alir anungji asenok tsüngda rarabangsentepbaji nüngdak mali. Tanü lanuputui asen tetsü-tebou mapang nungi tesentaktep tajung ayuba meraksai ayutsü merangtsüla aser taintem agütsüba shisatsüji len tuyur ama agizüka amshitsüla,” ta Tiameren-isa ayongzük.
Senden nung tetushi süa jaoker, PWD (Housing) Parliamentary Secretary, Levi Rengma-isa o jembidang, “Assamese aser Naga nungertem kidanger süa dang aotsü, anungji asenoki katika meima aser temulung lemtepba alitsüla” ta tayongzükba agütsü.
Asom aser Naga nungertem tesüiba mapang aibelentem dak dang rangloker mangatettep nung dang lira, asenok maneni timtemtsü aser makamait nung dang alitsü. Asenok katika angatettepa ali nungdang asen tarutsü ajungtsü, ta paisa ashi.
“Asenoki katika atema tajung bilemtsüra aser longjemra, asenoki tetsükdaktsü ajak koktettsü. State ana indang arrtsü ken o ajanga asenok tsüngda tesentaktep tajung aliba meraksadaktsütsüla,” ta Naga Hoho President, P. Chuba Ozukum-ia tanü senden nung ashi.
Asom Sahitya Sabha (ASS) President, Dr. Druya Jyoti Bora-ia ashiba agi, “Onoki Naga Hoho ajanga kin ka den dang masü saka Naga nunger ajak den inyaker, anungji Naga Hoho-ia Asom Sahitya Sabha (ASS) den kasa tangatetba nung inyaktsüla.”