2 buba Dimapur District badminton asayamong tenzükogo

Dimapur, September 22 (TYO): Tanü, Brehostibar nü nungi tenzüka 2 buba Dimapur District Inter Club badminton asayamong Dimapur kübok SM College badminton auditorium nung asayatsü tenzükogo.
“Pei taküm junga alitsü tangatetba nung  lanurtemi saisapongtsü sabang nung tetsüng ajemoktsü tenzükogo. Asayartemi pei jangra atemtsü atema dang masü saka peipok mesütsüsa saisapongtsü ajungshir. Asayartemi bendanga agütsüba ajanga asaya shilem mashika nung takok angutsü aser pei state nem konang tulu bener arutstütsü,” ta tongti tesemdanger, Nagaland Parliamentary Secretary, Skill Development & Border Affairs, Mhomlumo Kikon-i metetdaktsü.
“India asayartemi taruba Olympics asayamong 3 – 2020, 2024 aser 2028 nung takok ngua shilem agidaktsütsü nükjidong nung India Ato Kilonser, Narendra Modi-i asayartem renemshidaktsütsü atema telok balaka tawa tentettsüogo,” ta shia, tarutsü anogotem nung Nagaland nungi asayartemia Olympics nung shilem agitsü temeten ngua, Nagaland-a India’er saisapongtsü sabang nung tongti state ka kümdaktsütsü tayongzükba olen ka tongti tesemdangeri agütsü.
United Shuttlers teloki anogo 3 tashi agia asayatsü ayongba asayamong tetoktepba shilem 5 nung Dimapur nung tentetba badminton asayatsü telok 5 nungi asayar telok 68 tashi toktepa shilem agiba osang jangjaogo.