2 buba ISL tenzükogo; Kolkata-i goal 3-2 agi Chennaiyin akok

New Delhi, October 03 (Agencies): India nung ayongba football asayamong tulutiba, 2 buba Indian Super League (ISL) asayamong Chennai yimti nung kanga mera keta tanü Honibar nü tenzükogo.

Tanü asayamong tenzükba sentong nung Bollywood superstar-tem densema India aser alima tesem balala nungi saisapongtsüren nung tongti shilem agirtemi shilem agia liasü.

South Indian superstar, Rajnikanth-i tan asayamong ball sayatsüba sülen, Bollywood actress, Aishwariya Rai-i Bollywood film ken balala nung tsüngsanga sentepa alirtem tsüratemdaktsü.

Arjun Kapoor-i aniba sentong nung nungtugu actress, Alia Bhatt-ia tongti shilem agia liasü.

Ken mejema atener mongin, AR Raham-i linük naklu ken tena shilem agiba sülen ISL tenzükla, Nita Ambani-i asayamong lapoktsü.

Ano külen, tanü asayamong tenzükba asaya nung Atletico de Kolkata teloki goal 3-2 agi Chennayin FC telok madak takok ngua liasü.

Tanü asaya tenzüker minute 13 buba nung Hélder Postiga-i goal 1 agüja par Kolkata telok temaba jenjang nung ajungkettsü.

Ajisüaka, Jeje Lalpekhlua-i minute 31 buba nung par Chennaiyin telok asoshi goal 1 agüja telok anaprongla kasa jenjang kümdaktsü.

Asaya tanabuba shilem nungda Postiga-i maneni goal 1 agüja par Kolkata telok goal 2-1 agi temaba jenjang nung ajungkettsü.

Külem asayar, Valdo-i goal 1 agütsüba yong par Kolkata teloki temaba jenjang angu.

Tesülen, Elano-ia goal 1 agüja par Chennaiyin telok jenjang tajungba kümdaktsü.

Ajisüaka, tanüngba asaya mapang nung par teloki goal ka danga magütsütetba yong par Chennaiyin teloki tanü tamakok ajurutsüsa aküm.