2 buba Nokdenlemba Volleyball Trophy asayamong tembangogo

AKM-i ayongba 2 buba Nokdenlemba Volleyball Trophy 2015 nung takok angurtemi Mokokchung ADC, Bendanglila, tayonger aser asaya ketdangsertem den agiba arok noksa ka yangi angur. (Mokokchung, November 13)

Dimapur, November 13 (TYO): Mokokchung nung ayonga asayaba 2 buba Nokdenlemba Volleyball Trophy asayamong tanü Hokolbar nü tembangogo.
Tan asayamong nung Longsa Sporting Club (LSC)-i mezüngbuba aser Tongden Club Chungtia A (TCC-A) teloki tanabuba jenjang angu.
“Nokdenlemba ama mangdang tulu alir tongti lenir nem ‘Ao kaketshirtem tebu’ ta tenüng jatsütsüla,” ta asayamong tembangba sentong nung tongti tesemdanger, Nagaland MLA, Imkong L. Imchen-i metetdaktsü.
Tan ama tongti asayamong takok ngua ayongba atema Ao Kaketshir Mungdang (AKM) den pelaba olen ka lemsatepba den külemi, asayartemi tarutsü mapang nunga bendanga agüja shilem agitsü asoshi tongti tesemdangeri ajungshia liasü.
Champions telok, LSC-i takok marok aser kulikaket den külemi, senpet sen 80,000 agizük aser tanabuba jenjang anguba telok, TCC (A) teloki kulikaket aser senpet sen 50,000 agizüka liasü.
Semifinal nung shilem agitsü jenjang anguba telok ana, Lakhuni Sporting Club aser Merangkong Students’ Union na nema senpet sen 20,000 agütsü.
Ano, Individual shilem nung LSC asayar, Imkongsanen-i Best Spiker; külem asayar, Talimoa-i Best Setter aser TCC asayar, Moatemjen-i Player of the Tournament takokba ngua par asemprongla nem senpet sen 5000 den kulikaket agütsü.
Mokokchung ADC & Administrator, MMC, Bendanglila-i tanü takok angur nem sempet aser senpet ajunga agütsü.