2 buba state level Kala Utsav tetoktepba agi

Dimapur, September 27 (TYO) : September 27, 2016 nü Government Higher Secondary School, Seikhazou, Kohima nung State level Kala Utsav sentong ayongzüka agi.

Iba sentong nung School Education Secretary, Sarah Ritse-i o jembidang, tanü asen putu nung alima kanga kara ainba ajanga lanurtemi asen sobaliba aser maitsü nung temulung magütsür, ta ashi.

Asen sobaliba aser maitsü asentenshidaktsütsübaji tesayurtem, tsüraburtem aser taintem khuret lir. Asenoki tantsür-tamburtem taküm alibaji maongka ama züngshitsüla aser parnoki asenok toktsür maodang, asen sobaliba aser yimyatsüya asentenshitsüla, ta Sarah Ritse-isa ashi.

Sentong nung DMD & Programme Coordinator Kala Utsav, Timothy Thong-ia Kala Utsav indang metetdaktsüdang, iba benjung ya sobaliba aser yimyatsüya sayuba indang art festival ka lir ta ashi.

Kala Utsav ya 2015 küm HRD-i tenzükba national programme ka lir. Nisung ka indang maitsü, oshi, saobaliba aser libaliroji kanga tongtipang ta ajiteta Human Resource Development-i sobaliba aser maitsü wazüka ayutsü atema temulung agütsür, ta Timothy Thong-isa ashi.

Sentong nung mendenji Deputy Project Director RMSA, Ayie Yhome liasü aser Assistant Mission Director RMSA, Dr. Khatoli Khala-i anküp tepela o jembi.

Mokokchung, Zunheboto, Wokha, Phek, Tuensang aser Kiphire district tem nungi dance, music, visual art aser theatre shilemtem nung tetoktepba liasü aser takoker nem Government Higher Secondary School Seikhazou, Kohima Vice Principal-i sempet aser kulikakettem lema agütsü.

Shilem shia mezüngbuba jenjang takok angurtemi Nagaland tenüng nung National Level Kala Utsav Festival, New Delhi nung shilem agitsü.

2 buba Kala Utsav nung takok angurtem:

Dance :   1st place – Zunheboto

                2nd place – Mokokchung

Music     : 1st place – Kiphire

                  2nd place – Wokha

Visual art : 1st place – Phek

                2nd place – Mokokchung

Theatre  : 1st place – Mokokchung