2 Buba Yaongyimsen & Changtongya Yimjung Benjongmung amung

Changtongya, Monupii 4: “Saisapong ajanga Yimjung” omen nung ajemdaker 2 Buba Yaongyimsen aser Changtongya Yimjung Benjongmung Changtongya Multipurpose Hall nung Monupii 4 nü mungogo.
Yim ana yimjung aliba ajanga benjongmung sentong ka dang masü saka mapa tajung kechi inyakteter ta nükla tajung ayutsü kanga tongtibang ta Wb. Imnatiba Jamir, Advisor, Industries & Commerce, NIDC aser Chairman DPDB Mokokchung ajanga benjongmunger dang shia liasü.
Iba ama telungjem sentong ajanga asen lokti nung temelenshi adoktsü shisadanga inyaktsüla. Yim ana dang masü saka tangar yimtsüng aser kintem nungia shilem agitettsü asoshi bilemdanga inyaktsü nüngdak ta paisa shisema liasü.
Onük jembir Wt. Anungla, Associate Pastor Women, Yaongyimsen Baptist Church ajanga alima kinük ajaklen yimjung asoshi ayimtenba angur kechiyong yimjung ajanga dang sadoksadoka tebilemtsü mali nüburtem alir ta shia liasü.
Yamaji tanü lima nung kin aikati Saisapong ya yimjung asoshi amshir. Telungjem ajanga takok aser yimjung ajanga temoatsü angur, anungji lanurtemi memoatsü tashi ta meranga inyaktsü nüngdaker aser yamaji yimjung nung teti alitsü merangtsüla ta laisa ayongzük.
Iba sentong nung N.Yanglu, Executive Convenor YKT ajanga tarur pela agizüker yim ana nungi Council Chairman-i tayongzükba o jembi. Sp.Takotoshi ajanga temeja ken ka aten aser Watsü Culture Club, Mongsenyimti telok nungia ken ka ajanga shilem agia liasü. Iba sentong temer lanurtem saisapong sentong agia liasü.