20 buba ANCSU lokti mungdang tenzükogo

Kohima, Mongputeni/Oct. 22 (TYO): All Nagaland College Students’ Union (ANCSU) küm ana nung khen aliba lokti mungdang 20 buba Kohima Science College (Autonomous), Jotsoma nung October 21, 2021 nü “Heralding Tomorrow” omen nung ajemdaker tenzükogo.

Iba mungdang nung Nagaland tesem balala nung aliba college 38 nungi delegates 213 shilem agir, koba October 22-23, 2021 anogotem alitsü.

Iba mungdang ‘introductory session’ nung Nagaland College Principals Association (NCPA) ya tesemdanger tongti ka ama ANCSU indang taoba Magazine Secretary, Hikavi Kinimi menden sür agia liasü.

Iba mungdang ya Kohima Science College (Autonomous), Jotsoma nungi kaketshirtemi lapokja liasü.

Iba sentong nung Dr Lily Sema, Principal KSCJ ajanga jembiba mapang ANCSU aser delegates tem dang pelaba lemsa aser parnok college-i pelashishia agizüka liasü.

“Iba mungdang nung züngsem ajunga lanur, tazüng-tashir aser tejangraba alirtem kisüng lir, anungji tashi tait ‘youth force’ ka adokdaktsür. Aser item lanur dak asen linük tarutsü metaloka lir,” ta lai ashi.

Asenoki ochi meimba lanur nüngdaker, shirnoki asen nübur aser asen temeden asoshi nokdaktsüla aser ochi jembitsüla, ta ashi. “Shisatsü temürek nung meranga inyaktsü aser tarutsü lenir ajunga akumtsüpuba molungsentsü alitsüla aser khuret balala angatettsüla aser koktettsüla,” ta lai ashi.

Kaketshir ajangzüktsü atema ANCSU-i ken o tongtipang tongpoka jembitsü tamang akar, ta lai ashi.

Sentong nung Angami Students’ Union (ASU) tir, Bisevi Nakhro-i salem o lemsatepba mapang tesüiba küm 42 tsüngta ANCSU-i mapa tajung inyakba atema pelaba lemsatepa liasü.

“Asenoki lokti ajungtsü atema inyakba mapang kin telemsa, pei ajung asaa inyakba mesüra lennitsü raktepba nung mapang meindokli saka kati ka yariteptsü atema mapang agütsüti,” ta pai ajungshia liasü.

Iba sülen Baptist College, Kohima ajanga temeja ken ka tena liasü.

NCPA tir, Dr. Visakhonü Hibo-i iba sentong nung jembiba mapang, ANCSU-i kaketshirtem tajungtiba nung len aniba atema tenüngsang agütsü.

ANCSU tongti züluri kümsük 2019-2021 nung inyaksangshiba maparen balala indang osang agütsü aser iba sülen Union Assembly agia liasü.